Երևանը միշտ համարվել է բնապահպանական առումով թեժ կետ, հատկապես քաղաքի օդային ավազանի վիճակի բնութագրիչների պատճառով, որը  պայմանավորված է հիմնական և շարժական (ավտոտրանսպորտային)  աղտոտման աղբյուրների արտանետումների և դրանց տարածման օդերևութաբանական առանձնահատկություններով:
Երևանի օդային ավազանի վիճակի ամենամսյա ուսումնասիրությունն իրականացնում է ՀՀ բնապահպանության նախարարության <<Շրջակա միջավայրի վրա ներգործության մոնիտորինգի կենտրոն>> ՊՈԱԿ-ը։ Ներկայումս մայրաքաղաքում մթնոլորտի աղտոտվածության գնահատման համար կա 5 դիտակայան և 43 նմուշառիչ դիտակետ։ Վերցրած փորձանմուշներում որոշվում է  մթնոլորտում ծծմբի երկօքսիդի, ազոտի օքսիդների, գետնամերձ օզոնի, ածխածնի օքսիդների և փոշու պարունակությունը։ Ընթացիկ տարվա դիտարկմամբ գրանցվել են վնասակար տարրերի թույլատրելի նորմերը գերազանցող ցուցանիշներ: Երևանում միջին աղտոտվածության կտրվածքով փոշու պարունակության 70-80%-ը բաժին է ընկնում բնական աղտոտվածությանը։
Մթնոլորտի աղտոտումը մեղմացնելու նպատակով որոշակի աշխատանքներ են կատարվել տրանսպորտի ոլորտում:  Կարևոր քայլերից է քաղաքային աղբավայրում ջերմոցային գազերի արտանետումը կրճատելու նպատակով 2009թ. մարտի 10-ին Երևանի քաղաքապետարանի և ճապոնական <<Շիմիձու>> կորպորացիայի միջև կնքած պայմանագիրը` Նուբարաշենի թափոնակուտակիչում կենսագազի հավաքման և այրման ծրագրի վերաբերյալ, որը տարածքում սանիտարահիգիենիկ վիճակը բարելավելու նպաստավոր պայմաններ կստեղծի:
Թափոնակուտակիչում փորվել են հորատանցքեր, հորիզոնական գազամուղներով մխոցները  մեթան գազը մղում են կենտրոնական ուղղահայաց խողովակ: Ծրագրի տևողությունը 16 տարի է: Պայմանագրի գործողության ժամանակահատվածում, ըստ հաշվարկների, պետք է իրականացվի 512 հազար տոննա ածխաթթու գազի համարժեք արտանետումների սերտիֆիկացված կրճատում:

Երևանի տարածքում  բնական ջրավազանների (Հրազդան, Գետառ) աղտոտման հիմնական պատճառը տնտեսաֆեկալային և արդյունաբերական կոյուղու չմաքրված կամ ոչ բավարար մաքրված, ինչպես նաև հարող տարածքներից անկազմակերպ արտահոսքերով աղտոտումն է:
Ոչ բավարար վիճակում է ջրավազաններից առավել կարևորը` Երևանյան լիճը, որը շահագործման 40 տարվա ընթացքում չի հիմնանորոգվել: Գետերով ջրամբար են լցվում բազմաթիվ հիմնարկ-ձեռնարկությունների, մասնավոր տնատերերի կենցաղային և շինարարական աղբը, կեղտաջրերը և այլն:
Երևանի քաղաքապետարանի աշխատակազմի շինբարեկարգման և կոմունալ տնտեսության վարչությունները համապատասխան միջոցառումներ են ձեռնարկում Երևանյան լճի ափամերձ տարածքներում սանիտարական մաքրումը, աղբահանությունը կազմակերպելու նպատակով:
2009թ. կատարվել են Հրազդան գետի և Երևանյան լճի ընթացիկ նորոգման և սպասարկման աշխատանքներ:
2010թ. մաքրվել են Գետառ և Ողջաբերդ գետերի հուները։
2010թ. հունիսի 5-ին Հրազդանի կիրճում մեկնարկեց <<Մաքուր հայրենիք>> ծրագիրը, որն իրականացվեց Երևանի քաղաքապետարանի համապատասխան կառույցների անմիջական մասնակցությամբ և օժանդակությամբ: