<<Երևան Ջուր>> ՓԲ ընկերությունը պայմանագրային  4-րդ տարում (01.05.2009-01.06-2010թթ.)  ջրի հոսակորուստները նվազեցնելու նպատակով  կատարել է համակարգային փոփոխություններ։ Աշխատանքներ են տարվում  բաժանորդների  ծառայությունների  մակարդակի
և  <<1-85>>  հեռախոսային  կենտրոնի  գործունեության  արդյունավետության բարձրացման ուղղությամբ։ Ներդրվել և հաջողությամբ կիրառվում է բաժանորդներից ստացվող  դիմում-բողոքների  կառավարման  ավտոմատացված  համակարգչային ծրագիրը։ 
Գոտիավորման աշխատանքներին զուգընթաց` ջրի կորուստները նվազման միտում ունեն։  Օրվա ընթացքում Երևանում ջրամատակարարման  միջին տևողությունը 3-րդ տարում (01.06.2008 - 01.05.2009թթ.) կազմել է 80,1%, 4-րդ տարվա առաջին կիսամյակում` 83,2%, իսկ դեկտեմբեր-հունվար ամիսներին` 89,6%։  <<Վարձակալության  պայմանագրով>>  5-րդ  տարում  ջրամատակարարման շարունակականության համար սահմանված է 82,5%, սակայն այս ցուցանիշը մեծանալու միտում ունի։ Ուշադրության կենտրոնում են լինելու ջրամատակարարման քիչ ժամեր (4-6  ժամ)  ունեցող  տարածքները,  որտեղ  ցանցը  չափազանց  վնասված  է  և վերականգնման  կարիք  ունի։ Նախատեսվում  է  այդ  տարածքներում  հասնել նվազագույնը 8-ժամյա ջրամատակարարման։ 
Պայմանագրային 5-րդ  (01.06.2010-31.05.2011թթ.)  տարում  հոսակորուստները նախատեսվում է նվազեցնել մինչև 283.9 մլն խմ կամ միջինը 9000լ/վրկ։ Նախնական գնահատմամբ`  ուսումնասիրվող բազմաբնակարան շենքերում միջին կորուստը կազմում է շենքին տրված ջրաքանակի  50%-ը։ Ընդ որում, տեխնիկական կորուստը, մոտավոր գնահատմամբ, կազմում է շենքի ներսում կորստի 15%-ը։ 

Ներկայումս կեղտաջրերի մաքրման կայանը գործում է մասնակի։ Կատարվում է միայն մեխանիկական զատում  16 մմ ճաղավանդակով և ավազորսիչներով, որոնց մաքրումն իրականացվում է տարեկան 4 անգամ։ 
Հայաստանի Հանրապետության և Ֆրանսիայի  Հանրապետության կառավարությունների միջև  2007թ.  մայիսի  27-ին կնքված <<ֆինանսական արձանագրության>> համաձայն` Ֆրանսիայի կառավարության կողմից Երևանի խմելու ջրի համակարգի բարելավման և մաքրման ծրագրի իրականացման համար հատկացվել է  23.9  մլն  եվրո կոնցեսիոն ֆինանսավորում և 500 հազ. եվրո դրամաշնորհ, որը նախատեսված է ծրագրի տեխնիկական աջակցության համար և պետք է ապահովի ծրագրի տնտեսական կենսունակությունն ու իրականացնի ջրի սակագնային ուսումնասիրությունը։
<<Աերացիա>>  կայանի վերականգնման ներդրումային ծրագրի համար նախատեսված է  6.0  մլն  եվրո: Մաքրման  հիմնական  նպատակն է  նվազեցնել կայան մտնող ջրի աղտոտվածությունը առնվազն 40%-ով։
Երևանի բարձրահարկ շենքերում վերելակների թիվը  4294  է,  որից աշխատող՝  4121։ Ավան վարչական շրջանում հաշվառված է  330  վերելակ, Արաբկիրում՝  460,  Աջափնյակում՝  302,  Դավթաշենում՝  385,  Էրեբունում՝  211, Կենտրոնում՝ 580, Մալաթիա-Սեբաստիայում՝ 958, Նոր Նորքում՝ 589, Շենգավիթում՝ 216, Քանաքեռ-Զեյթունում՝ 257, Նուբարաշենում՝ 6։
2010  թվականին Երևանի  բարձրահարկ բազմաբնակարան շենքերի վերելակների վերանորոգման և վերականգնման համար ծախսվել է 97.3 մլն դրամ։  2011  թվականին  վերելակների վերանորոգման համար նախատեսված է 89,190.9  հազ.  դրամ,  որից՝ բազմաբնակարան շենքերի վերելակների կապիտալ բնույթի աշխատանքների համար՝ 83,190.9 հազ. դրամ և ընթացիկ նորոգման համար՝ 6,000.0 հազ. դրամ։ 

Մայրաքաղաքի աղբահանության և  սանիտարական մաքրման աշխատանքներն իրականացվում  են  թվով  12  մասնագիտացված ընկերությունների 1470  աշխատակիցների և  370  միավոր հատուկ նշանակության մեքենասարքավորումների միջոցով,  որոնք ներկա  դրությամբ մաշված են գրեթե  80-85%-ով։
Աղբահանությունը կատարվում է  4720  բազմաբնակարան շենքերից և  53000 մասնավոր տնատիրություններից։  Երևանի սանիտարական մաքրման աշխատանքների ծավալն օրական կազմում է 12,760.0 հազ. քմ։ Մայրաքաղաքի  բազմահարկ  բազմաբնակարան շենքերում առկա է  3901 հատ աղբամուղ:
2010 թվականին Երևանի սանիտարական մաքրման աշխատանքների իրականացման համար ծախսվել  է  3,200.0  մլն  դրամ,  2011  թվականին այս աշխատանքների համար նախատեսված է 3,262.0 մլն դրամ։ 
2010թ. գարնանը Հրազդանի կիրճում <<Երեք կամուրջ>> ծրագրի շրջանակներում իրականացվեցին  սանիտարական մաքրման և աղբահանության լայնածավալ աշխատանքներ:
Երևանի ավագանու 2010 թվականի նոյեմբերի 26-ի հ.157-Ա որոշմամբ 158,6 մլն դրամ  է հատկացվել ձյան մաքրման մեքենասարքավորումների ձեռքբերման համար։ Համաձայն կնքված պայմանագրերի` մինչև դեկտեմբերի  15-ը ձեռք կբերվի 27 միավոր մեքենասարքավորում,  որից  10-ը ձյուն մաքրող, 17  միավորը` մայթ մաքրող սարքավորում։
Երևանում 2010  թվականին  տեղադրվել Է 1300 մեծ և փոքր աղբաման։ 
2010թ.  գարնանը  ՀՀ էկոնոմիկայի նախարարության  գնահատող հանձնաժողովի կողմից հավանության է արժանացել Միացյալ Թագավորության Integrated Skills Limited ընկերությունը,  որն էլ ստանձնեց Երևանի սանիտարական մաքրման և աղբահանության աշխատանքների խորհրդատվական ծառայությունների մատուցումը` 18 ամիս տևողությամբ:
Մայրաքաղաքի աղբահանության և սանիտարական մաքրման համակարգը, մի շարք բացթողումներով և առկա խնդիրներով չի համապատասխանում ժամանակակից եվրոպական երկրներում գոյություն ունեցող չափանիշներին։ 
ՀՀ կառավարությունը դիմել է Համաշխարհային բանկին՝  Երևանի սանիտարական մաքրման և աղբահանության աշխատանքներին պետական և մասնավոր արտասահմանյան օպերատորներ ներգրավելու օժանդակություն ցուցաբերելու համար։

Նուբարաշենի աղբավայր 

Երևանում կուտակվում է երկրի ընդհանուր կոշտ թափոնների 70-75%-ը:  Երևանի համար մեծ նշանակություն ունի Նուբարաշենի քաղաքային աղբավայրը,  որը գործարկվել է դեռևս  1950-ական թվականներին և գտնվում է մայրաքաղաքի կենտրոնից մոտ 9-10 կմ հեռավորության վրա` զբաղեցնելով 52.3 հա տարածք։  Մայրաքաղաքի տարածքից քաղաքային աղբավայր է տեղափոխվում օրական միջին հաշվով  550-600 տոննա կամ տարեկան  190-200  հազար տոննա կենցաղային աղբ։ 
Կենցաղային աղբը վերամշակման կամ տեսակավորման չի ենթարկվում,  այլ այն խտացվում, վնասազերծվում է և ծածկվում  25-30 սմ հողի շերտով։ Այդ աշխատանքները չեն համապատասխանում եվրոպական չափանիշներին,  որի հետևանքով աղբավայրում առաջանում են գազերի արտանետումներ։ Դրանք կրճատելու նպատակով  2009թ.  մարտի  10-ին Երևանի քաղաքապետարանի  և ճապոնական  <<Շիմիձու>>  կորպորացիայի  միջև  կնքվել  է  համաձայնագիր Նուբարաշենի թափոնակուտակիչում կենսագազի հավաքման և այրման ծրագրի վերաբերյալ,  որը կարևոր է հատկապես բնապահպանական, շրջակա միջավայրի բարելավման և սանիտարահիգիենիկ մաքրման տեսանկյունից։ 
Նուբարաշենի թափոնակուտակիչում  (մոտ  8  հա տարածք),  փորվել են հորատանցքեր,  մխոցներով մեթան գազը  հորիզոնական գազամուղերով մղվում է կենտրոնական ուղղահայաց խողովակ (ջահ) և այրվում։ Տարածքը ծածկված է անթափանց թաղանթով և հողի շերտով։  Ծրագրի տևողությունը  16  տարի է։ Պայմանագրի գործողության ժամանակահատվածում՝ մինչև  2023  թվականը,  ըստ Հաշվարկների`  պետք է իրականացվի  512  հազ.  տոննա  СO2-ի համարժեք արտանետումների սերտիֆիկացված կրճատում։ 
Ծրագրի ֆինանսավորումը,  ներառյալ բոլոր տարիներին համակարգի պահպանման և շահագործման ծախսերը, կկազմի մոտ  5,5  մլն  ԱՄՆ դոլար,  որը կիրականացնի ճապոնական կողմը։ Ներկա պահին արդեն ներդրվել է 2.75 մլն ԱՄՆ դոլար։  Կառույցը հանձնվել է հայկական կողմին՝ որպես  սեփականություն։ 2010թ.  սեպտեմբերի  1-ի դրությամբ Նուբարաշենի աղբավայրում արդեն տեղադրվել, վնասազերծվել և հողի շերտով ծածկվել է 120 հազ. տոննա կենցաղային աղբ։ 
Խորհրդատվական ընկերության հաշվետվության հիման վրա Համաշխարհային բանկը կհայտարարի միջազգային մրցույթ։  Հաղթող ճանաչված ընկերությունների հետ կկնքվեն  Երևանի սանիտարական մաքրման,  աղբահանության աշխատանքների,  ինչպես նաև Նուբարաշենի աղբավայրի նախագծման, կառուցման և շահագործման ծրագրերի պայմանագրեր։ Նախատեսվում է կառուցել և շահագործել եվրոպական չափանիշներին համապատասխան նոր աղբավայր։ 

Արտաքին լուսավորություն  

 <<Երքաղլույս>> ՓԲԸ-ն սպասարկում է 26.178 հենասյուն, որոնց վրա մոնտաժված են 48.222 հատ լուսատու։ Գործող ցանցը կազմում է 1174 կմ։  2009-2010  թվականների լայնածավալ աշխատանքների շնորհիվ վերականգնվել է  322  կմ  բակային լուսավորության ցանց,  մինչև  2010  թվականի վերջը կվերականգնվի ևս 51 կմ լուսավորության ցանց։ 
2011  թվականին արտաքին լուսավորության ցանցի  շահագործման և պահպանման աշխատանքների համար  նախատեսվում է հատկացնել 1,696,000.0 հազ. դրամ։ Ծրագրով նախատեսված է լուսավորել մայրաքաղաքի երկրորդական փողոցները,  ներդնել արտաքին լուսավորության կառավարման և էներգախնայողության էլեկտրոնային համակարգ։ Կտեղադրվեն շուրջ  400 էլեկտրասյուներ և 1200 լուսատուներ։

Էլեկտրամատակարարում

2010  թվականին  Երևանում թվով  110/35կվ ենթակայանների վերազինման,  սարքավորումների արդիականացման նպատակով  կատարվել են 11,200.0  մլն  դրամի չափով աշխատանքներ։ 

Գազամատակարարում
 

2010  թվականի  հոկտեմբերի  1-ի  դրությամբ Երևանում գազահամակարգին միացված բաժանորդների թիվը կազմել է 237867։ 
2010 թվականի հունվար-սեպտեմբերի ընթացքում կատարվել են  104.7  մլն դրամի շինմոնտաժային աշխատանքներ  նախադպրոցական 83 հաստատություններում, որից 81-ում աշխատանքներն ավարտվել են։  Նույն ժամանակահատվածում իրականացված բազմաբնակարան շենքերի գազիֆիկացման աշխատանքների արդյունքում 622  բնակարանների ընձեռվել է գազամատակարարման հնարավորություն։
Գազասպառողների բնակարաններում տեղադրվել են 78784  վթարային ազդանշանային սարքեր և անջատիչ կափույրներ։ 
2011թ.  նախատեսվում է շուրջ  150.0  մլն  դրամի ներդրումներ՝ շուրջ 830.0 մլն դրամ՝ մոտ 30000 հատ անվտանգության համակարգերի տեղադրման և շուրջ 165.0 մլն դրամ՝ մոտ 5000 նոր բաժանորդների բնակարաններում և առանձնատներում կենցաղային գազի հաշվիչների տեղադրման համար։ 

Էլեկտրոնային հաղորդակցություն
 

<<ՎիվաՍել-ՄՏՍ>> բջջային կապի ծածկույթը երկրի տարածքում կազմում է 80%, <<Օրանժինը>>՝ 83%, <<ԱրմենՏելինը>>՝ 35%։  Բջջային ցանցի զարգացման,  նոր ծառայությունների և կապի որակի բարելավման նպատակով <<ՎիվաՍել-ՄՏՍ>>-ը գործարկել է  3  նոր բջջային հիմնական կայաններ  (երկրորդ սերունդ)։  37  կայաններում տեղադրվել են լրացուցիչ բջջային սարքավորումներ՝ ցանցի թողունակությունն ավելացնելու համար։ Գործարկվել են 30 հիմնական կայաններ։ Երևանում փակ  (նկուղային և կիսանկուղային) տարածքների համար տեղադրվել են երկրորդ և երրորդ սերնդի 105  վերահաղորդիչ սարքեր։
2011  թվականին նախատեսվում է  20  նոր  կայանների կառուցում և  50 վերահաղորդիչ սարքերի տեղադրում Երևան քաղաքի այն մասերում,  որտեղ ծածկույթը թերի է։  Նախատեսվում է զարգացնել գոյություն ունեցող շարժական կապի տեխնոլոգիաները՝ գերարագ ինտերնետային կապ ապահովելու համար։ 
<<ԱրմենՏել>> ՓԲ ընկերությունը 2010 թվականի ընթացքում ընդլայնել է 50000 բաժանորդային գծերի համար  ADSL  տեխնոլոգիայի վրա հիմնված լայնաշերտ ինտերնետ հասանելիության ծառայության մատուցման հնարավորությունը  և նոր հենքի ու կայանների տեղակայմամբ երրորդ սերնդի ցանցի (3G) ռադիոծածկույթը։
<<Օրանժը>>  2010  թվականի ընթացքում տեղադրել է  14  նոր  կայաններ, բացվել են 7 նոր խանութներ։  2010  թվականին  կավարտվի  8  լրացուցիչ կայանների տեղադրումը, կբացվեն 5 նոր խանութներ։ 
2011  թվականին նախատեսվում է իրականացնել օպտիկամանրաթելային մալուխի տեղակայում՝ օգտագործելով քաղաքային լուսավորության հենասյուները։