Երևանի քաղաքապետ Տարոն Մարգարյանի հանձնարարությամբ քաղաքապետարանի աշխատակազմի սոցիալական ապահովության վարչությունը նախաձեռնել և մինչև Ամանոր շարունակելու է  մայրաքաղաքի փողոցներում, բակերում, կանգառասրահներում և այլ տարածքներում գիշերող, մշտական բնակության վայր չունեցող անձանց ժամանակավոր կացարաններով ապահովման ծրագիրը:

Երևանի քաղաքապետարանի ֆինանսավորմամբ և հայ-դանիական <<Հանս Քրիստիան Կոֆոեդ>> բարեգործական հիմնադրամի աջակցությամբ լուծվել է անօթևանների կացարանի, սննդի, հիգիենայի, խնամքի և առաջին անհրաժեշտության այլ միջոցառումների կազմակերպումը: Բժիշկների կողմից իրականացվում է համալիր բուժզննություն: Առողջական խնդիրներ ունեցողներին կմատուցվեն բժշկական համապատասխան ծառայություններ:

Սոցիալական ապահովության վարչության պետ Ռուզաննա Զաքարյանը նշել է, որ հաշվառումից և խնդիրների գույքագրումից հետո, նախատեսվում է լուծել նաև անօթևանների աշխատանքի տեղավորման և այլ հաստատություններ տեղափոխման հարցը:
Շնորհակալություն հայտնելով քաղաքապետ Տարոն Մարգարյանին նախաձեռնության և այն կյանքի կոչելու համար` խնամքի տակ անցած անօթևանները նշել են, որ հատկապես ամանորից առաջ նման քայլի շնորհիվ իրենց համար սկսում է երկրորդ կյանք:

Երևանի քաղաքապետարանի տեղեկատվության
և հասարակայնության հետ կապերի վարչություն