ԵՐԵՎԱՆԻ ՔԱՂԱՔԱՊԵՏԱՐԱՆ

ՊԱՇՏՈՆԱԿԱՆ ԿԱՅՔ

ընդլայնված որոնում

Մշակույթ

Վարչության գործառույթներ

Մշակույթի վարչության գործունեությունը

 

Երևանի քաղաքապետարանի ենթակայությամբ գործում է 72 մշակութային կազմակերպություն, այդ թվում՝ 3 թատրոն (Երևանի Հրաչյա Ղափլանյանի անվան դրամատիկական, Պատանի հանդիսատեսի, «Մհեր Մկրտչյան» արտիստական թատրոնները), 19 գրադարան (այդ թվում՝ Ավ. Իսահակյանի անվան կենտրոնական գրադարանը), 5 թանգարան («Էրեբունի» պատմահնագիտական արգելոց-թանգարանը, Երևան քաղաքի պատմության, Ժամանակակից արվեստի, Կարեն Դեմիրճյանի և Ֆրիտյոֆ Նանսենի թանգարանները)։
Երևանի ենթակայությամբ գործում են երաժշտական, արվեստի և կերպարվեստի 26 դպրոցներ, որոնց սաները մասնակցում են համապետական և միջազգային մրցույթների, փառատոների՝ արժանանալով բարձր պարգևների և մրցանակների։
Կազմակերպվում է երաժշտական և արվեստի դպրոցների ամենամյա մրցույթ–փառատոնը, որի ընթացքում որոշվում է դպրոցների «Լավագույն տասնյակը»։ Բացի այդ՝ երաժշտական և արվեստի դպրոցների սաներից ձևավորվել է «Երևան» պատանեկան սիմֆոնիկ նվագախումբը, որը 2019թ. գալահամերգով ելույթ ունեցավ Ազգային ժողովի բակում:
Երևանի քաղաքապետարանի աշխատակազմի մշակույթի վարչության համակարգմամբ են գործում նաև Յու. Բախշյանի անվան և «Հայաստանի փոքրիկ երգիչներ» մանկական ֆիլհարմոնիաները, «Երևան» փողային նվագախումբը, Երևանի մանկապատանեկան ստեղծագործության քաղաքային կենտրոնը, «Հայ-Արտ» մշակութային կենտրոնը և Երևանի կենդանաբանական այգին:
Վարչական շրջաններում գործում են գեղարվեստական կրթության և գեղագիտական դաստիարակության հաստատություններ, որոնց սաները մշտապես մասնակցում են քաղաքային, համապետական և միջազգային նշանակության տարաբնույթ ստեղծագործական-մշակութային նախագծերին։
Աշխատակազմի մշակույթի վարչությունն իրականացնում է մշակույթի և զբոսաշրջության զարգացմանը միտված ծրագրեր, ինչպես նաև պետական, ազգային տոներին նվիրված միջոցառումներ։


2019թ. իրականացված ծրագրեր

 

2019թ. Երևանում իրականացվել են մի շարք համաքաղաքային և պետական և հանրային միջոցառումներ:

Ամանորյա միջոցառումների ծրագրով 2018թ. վերջին օրը մայրաքաղաքի Հանրապետության հրապարակում մեկնարկեց համերգային ծրագիր, այստեղ է կայացել նաև սուրբծննդյան տոնին նվիրված համերգը:
Բուն Բարեկենդանի տոնի առթիվ Երևանի քաղաքապետարանի և Արարատյան Հայրապետական թեմի կազմակերպած միջոցառումն անցկացվել է Արարատյան Հայրապետական թեմի առաջնորդանիստ Սուրբ Սարգիս եկեղեցում:
Թատրոնի համաշխարհային օրվա կապակցությամբ «Դվին մյուզիք հոլ»-ում կազմակերպվել է համերգային ծրագիր, Երևանի քաղաքապետի ընդունելություն և պարգևատրման արարողություն:
Երևանի Սիրահարների այգում կազմակերպվել է տոնական միջոցառում՝ նվիրված «Մայրության և գեղեցկության տոնին»:
Իրականացվել է Հայոց ցեղասպանության 104-րդ տարելիցին նվիրված միջոցառում Ծիծեռնակաբերդում՝ Հայաստանի պետական ազգային ակադեմիական երգչախմբի մասնակցությամբ:
Ջազի միջազգային օրվան նվիրված Կասկադ համալիրի հարակից տարածքում կազմակերպվել է համերգային ծրագիր՝ արտերկրից հրավիրվել են ջազային երգիչներ և կատարողներ, որոնց թվում էր «Գրեմմիի» քառակի մրցանակակիր աշխարհահռչակ երաժիշտ Գոնսալու Ռուբալկաբան:
Երեխաների իրավունքների պաշտպանության օրվա առթիվ Ազատության հրապարակում իրականացվել է թեմատիկ մշակութային միջոցառում, որի ժամանակ կայացել է «Մերի Փոփինսը Երևանում» երաժշտական ներկայացման առաջնախաղը:
Կազմակերպվել է Երևանի քաղաքապետարանի երաժշտական և արվեստի դպրոցների 12-րդ մրցույթ-փառատոնի լսումների փուլը 10 անվանակարգով, որին մասնակցել են Երևանի քաղաքապետարանի 10 արվեստի և 15 երաժշտական դպրոցների սաները։ Անցկացվել է նաև մրցույթ-փառատոնի եզրափակիչ գալահամերգ, որի ժամանակ խրախուսվել են առաջին լավագույն տասնյակն զբաղեցրած դպրոցների տնօրենները:
Իրականացվել է պատանի ստեղծագործողների մրցույթ-փառատոն՝ նվիրված Արամ Խաչատրյանի ծննդյան 116-ամյակին։ Արամ Խաչատրյանի տուն-թանգարանում կազմակերպվել է համերգային ծրագիր. լավագույն պատանի ստեղծագործողները խրախուսվել են մրցանակներով:
Իրականացվել է «Երևանյան ամառ» երաժշտական համերգաշարը՝ յուրաքանչյուր շաբաթ-կիրակի մայրաքաղաքի տարբեր հարթակներում բացօթյա համերգային ծրագրերով հանդես են եկել ճանաչված երգիչ-երգչուհիներն ու համույթները:
Իրականացվել է «Երևան» պատանեկան սիմֆոնիկ նվագախմբի անդրանիկ բացօթյա ելույթը՝ Ազգային ժողովի հարակից այգում՝ ՀՀ վարչապետի, Երևանի քաղաքապետի, պետական և հոգևոր այրերի մասնակցությամբ. առաջին անգամ հնչեց Տիգրան Մանսուրյանի «Երևան» ստեղծագործությունը:
Կազմակերպվել է ընդունելություն «Ոսկե ծիրան» Երևանի կինոյի ամենամյա փառատոնի մասնակիցների և պատվավոր հյուրերի համար:
Ցուցաբերվել է աջակցություն «Ոսկե ծիրան» Երևանի կինոյի ամենամյա փառատոնին և «Երևանյան հեռանկարներ» միջազգային երաժշտական փառատոնին:
«Երևանի օրերը Սանկտ Պետերբուրգում» ծրագրով Երևանի քաղաքապետարանի պատվիրակության պաշտոնական այցի ժամանակ պետերբուրգյան պետական կապելլայի համերգասրահում ելույթ է ունեցել «Թումո» ստեղծարար տեխնոլոգիաների կենտրոնի «ԹմբաԹա» երիտասարդական ժողովրդական ռոք խումբը, իսկ Ա. Բրյանցևի անվան պատանի հանդիսատեսի թատրոնի բեմում ներկայացվել է Նարինե Գրիգորյանի «Ընտանիքս իմ ճամպրուկում է» մենաներկայացումը:
«Երևանի օրերը Արցախում» ծրագրով ազգագրական համույթներն ու անհատ կատարողները ելույթ ունեցան Վազգեն Սարգսյանի հոբելյանին նվիրված միջոցառման ընթացքում՝ ԱՀ ՊԲ N զորամասում, իսկ Ստեփանակերտում ելույթ ունեցավ Հայաստանի պետական կամերային երգչախումբը (գեղ. ղեկ. և գլխավոր դիրիժոր՝ Ռոբերտ Մլքեյան): Ստեփանակերտի Վերածննդի հրապարակում, Հայաստանի պետական սիմֆոնիկ նվագախմբի մասնակցությամբ (գեղ. ղեկ. և գլխավոր դիրիժոր՝ Սերգեյ Սմբատյան) տրվեց Մանսուրյանական օրերի մեկնարկը՝ նվիրված ՀՀ ժողովրդական արտիստ, կոմպոզիտոր Տիգրան Մանսուրյանի 80-ամյա հոբելյանին, որը շարունակվեց Երևանում և եզրափակվեց Գյումրիում:
Երևանի հիմնադրման 2801-ամյակին նվիրված «Էրեբունի-Երևան» տոնակատարությունն առաջին անգամ իրականացվեց նոր ձևաչափով. Վարչական բոլոր շրջաններում կայացան տոնական համերգներ՝ լավագույն երգիչ-երգչուհիների, հանրույթների մասնակցությամբ. ջազ, ռետրո, ռոք, ազգագրական, ժողովրդական, դասական և այլն: Ալ. Սպենդիարյանի անվան օպերայի և բալետի ազգային ակադեմիական թատրոնում կայացավ ամփոփիչ պաշտոնական միջոցառումն ու համերգային ծրագիրը: Միջոցառումն ավարտվեց համաժամանակյա տոնական հրավառությամբ:
«Երևանի օրերը Վանաձորում» ծրագրով Վանաձորի գեղագիտության ազգային կենտրոնում կայացավ Երևանի արվեստի դպրոցների սաների «Լոռին իմ սրտում» խորագիրը կրող ցուցահանդեսը, «Ժամանակակից գրադարանը» սեմինար-խորհրդակցությունը Ավ. Իսահակյանի անվան գրադարանի մասնակցությամբ՝ Լոռու մարզային գրադարանում, Ալ. Սպենդիարյանի անվան երաժշտական դպրոցի ջազային նվագախումբը ելույթ ունեցավ Վանաձորի Է. Կզարթմյանի անվան երաժշտական դպրոցում, նույն դպրոցում ելույթ ունեցավ Հայաստանի պետական կամերային նվագախումբը, Վանաձորի Հովհ. Աբելյանի անվան պետական դրամատիկական թատրոնում ելույթ ունեցավ Երևանի կամերային պետական թատրոնը, իսկ ծրագիրն ամփոփվեց Վանաձորի «Հայք» հրապարակում՝ Արամ ՄՊ3-ի և «Գաթաբենդ» համույթի մասնակցությամբ գալահամերգով:
Կայացել է «Թումանյանական օրերը Թբիլիսիում» մշակութային ծրագիրը՝ Հովհաննես Թումանյանի 150-ամյակին նվիրված: Թբիլիսիում գտնվող հայկական մշակույթի տանը կազմակերպվել է միջոցառում հայ և վրացի մտավորականների մասնակցությամբ:
«Երևանի օրերը Գյումրիում» ծրագրով Գյումրու Ա. Բրուտյանի անվան երաժշտական դպրոցում կայացավ Ալ. Սպենդիարյանի անվան երաժշտական դպրոցի ջազային նվագախմբի ելույթը, «Ժամանակակից գրադարանը» սեմինար-խորհրդակցությունը Ավ. Իսահակյանի անվան գրադարանի մասնակցությամբ՝ Շիրակի մարզային գրադարանում, Գյումրու Վ. Աճեմյանի անվան պետական դրամատիկական թատրոնում կայացավ Հայաստանի ազգային ֆիլհարմոնիկ նվագախմբի ելույթը, նույն դահլիճում Երևանի Հր. Ղափլանյանի անվան դրամատիկական թատրոնը ներկայացրեց «Փարիզյան դատավճիռ» ներկայացումը:
Երաժշտական և արվեստի դպրոցների համար ձեռք է բերվել անհրաժեշտ գույք և երաժշտական՝ 27 անուն 110 երաժշտական գործիք:
Ամանորին և Սուրբ ծննդի տոնակատարությունների առիթով Կառավարության աջակցությամբ իրականացվել են Գլխավոր տոնածառի լույսերի հանդիսավոր վառելու արարողության և տարեմուտի համերգային ծրագրերը՝ «Գարիկ-Սոնա» նվագախմբի, հանրահռչակ երաժիշտ Գորան Բրեգովիչի մասնակցությամբ: Հյուսիսային պողոտայում կազմակերպվել է բրենդային տոնածառների ցուցադրություն, Երևանի հիմնադրման 2750-ամյակի շատրվանների պուրակում կազմակերպվել է Ամանորյա տոնավաճառ, Հանրապետության հրապարակում՝ հեքիաթային քաղաք-հայեցակարգի գործունեությունը, դեպի գլխավոր տոնածառ տեղադրվել է մետաղական վերգետնյա ժամանակավոր անցում: