ԵՐԵՎԱՆԻ ՔԱՂԱՔԱՊԵՏԱՐԱՆ

ՊԱՇՏՈՆԱԿԱՆ ԿԱՅՔ

ընդլայնված որոնում

Բնապահպանություն

Վարչության գործառույթներ
Բնապահպանություն

Մայրաքաղաքի կանաչ կերպարը կփոխվի. նոր մոտեցումներ՝ կանաչապատման ոլորտում

 

Նոր կերպար, նոր մոտեցումներ՝ Երևանի կանաչապատման ոլորտում և ծրագրային հստակ քաղաքականություն՝ տարբեր ուղղություններով: 
Քաղաքի կանաչ կերպարը կփոխվի այն իմաստով, որ կտնկվեն նոր՝ ծաղկող ծառեր և թփեր, կլինեն նաև մի քանի նոր ծաղկատեսակներ:

Նախատեսվում է զարգացնել ուղղաձիգ կանաչապատումը՝ պատերի, վերգետնյա անցումների, պատշգամբների ու այլ հատվածների վրա: Քաղաքի հոբելյանի առիթով Երևանին նվիրված 2800 արծաթափայլ եղևնիները կպահվեն հատուկ տարածքում այնքան ժամանակ, մինչև մասնագետները որոշեն, որ դրանք կարող են ապրել «ինքնուրույն» ու կտնկվեն արդեն իրենց տեղերում: Խաչիկ Հակոբյանի խոսքով՝ էական է, որ քաղաքը սեփական բարձրարժեք բուսատեսակներ ունենա: Ըստ այդմ, կզարգացվեն տնկարանային և ջերմոցային տնտեսությունները: Այժմ համայնքն ունի 20 հեկտար տնկարաններ, այդ թվում՝ 6000 քմ ջերմոցային տնտեսություն: Նոր մոտեցմամբ կիրականացվի նաև ծառերի էտը, ընդ որում, էտված ճյուղերն ու փայտանյութը կմանրացվի և կօգտագործվի կանաչապատման ոլորտում:

Երևանը կհրաժարվի այն ծառատեսակների կրապատումից, որոնց համար դա անհրաժեշտ չէ, կկրապատվեն միայն դրա կարիքն ունեցող ծառատեսակները: Այս առումով 2019-ը կլինի անցումային, ընթացքում հետևություններ կարվեն՝ որոշելու հետագա տարիներին կրապատման նպատակահարմարությունը:
Կկանաչապատվեն և կձևավորվեն Դավթաշեն-Աշտարակ նոր ճանապարհահատվածին, ինչպես նաև Մոնթե Մելքոնյան մայրուղուն հարող հատվածները: Հիմնանորոգվող մանկապարտեզների, դպրոցների և հանրային այլ կառույցների, նաև բակային տարածքներում ամբողջական կանաչապատում կիրականացվի, Հրազդանի կիրճն ու Երևանյան լճին հարող տարածքը կմաքրվեն: Երևան կբերվի 8500 խմ բուսահող, և հողային հատվածը կվերականգնվի սիզամարգային հատվածներում:
Օպերայի տարածքում քաղաքային իշխանության մոտեցումը ևս հստակ է: Սրճարանների փոխարեն քաղաքի ամենակենտրոնում արդեն այս տարի կկառուցվի նոր պուրակ: Կվերստեղծվի շուրջ 1 հեկտար կանաչ տարածք՝ նոր լուծումներով, բարձրարժեք ծառատեսակներով: Պուրակի նախագծման աշխատանքներն արդեն մեկնարկել են:

 

Բնապահպանական թեմաներով դասընթացներ` համայնքային և քաղաքացիական ծառայողների համար

 

Երևանի քաղաքապետարանի մոտ 350 աշխատակից մասնակցել է բնապահպանական թեմաներով դասընթացներին և վերապատրաստվել: Նախաձեռնությունն իրականացվել է ՄԱԿ-ի Զարգացման ծրագրի (ՄԱԶԾ) «Գլոբալ բնապահպանական օգուտների ստեղծում շահագրգիռ կողմերի էկոլոգիական կրթության և իրազեկության բարձրացման միջոցով» ծրագրով: Ծրագիրը ֆինանսավորվում է «Գլոբալ էկոլոգիական հիմնադրամի» (ԳԷՀ) և համաֆինանսավորվում ՄԱԶԾ-ի կողմից։ Նպատակն է՝ հզորացնել երկրի կարողությունները՝ օգտագործելու բնապահպանական կրթությունը և իրազեկումը որպես բնական պաշարների կառավարման գործիքներ՝ շահագրգիռ կողմերի հմտությունների զարգացման համար։ Դասընթացներին մասնակցել են ինչպես տեղական ինքնակառավարման մարմինների, այնպես էլ պետական կառավարման ու մասնավոր հատվածի ներկայացուցիչներ:
Ծրագրի մեկնարկային հանդիպմանը ներկա էին Երևանի քաղաքապետի առաջին տեղակալ Հրաչյա Սարգսյանը, Հայաստանում ՄԱԶԾ մշտական ներկայացուցիչ Դմիտրի Մարիասինը, ՀՀ բնապահպանության նախարարի առաջին տեղակալ Իրինա Ղափլանյանը, ՀՀ տարածքային կառավարման և զարգացման նախարարի տեղակալ Լիլիա Շուշանյանը, պաշտոնատար այլ անձինք:
Վերապատրաստումը անցկացվել է ս.թ. մայիսի 14-17-ը ՀՀ պետական կառավարման ակադեմիայում: Դասընթացները վարել են Հայաստանի ամերիկյան համալսարանի մասնագետները, որի ընթացքում քաղաքապետարանի մասնագետները ծանոթանացել են բնապահպանական կառավարման, կայուն քաղաքների, վերականգնվող էներգետիկայի, էներգախնայողության, շրջանաձև տնտեսության, ինչպես նաև քաղաքային տնտեսության բնապահպանական բաղադրիչներ ընդգրկող այլ ոլորտների նոր հնարավորություններին:
Վերապատրաստման մասնակիցները ևս փաստեցին դասընթացի կարևորությունը և հայտնեցին իրենց պատրաստակամությունը՝ կիրառելու ձեռք բերված գիտելիքներն իրենց առօրյա գործունեությունում։
Դասընթացի արդյունավետությունը գնահատելու նպատակով վերապատրաստման սկզբում և վերջում մասնակիցները թեսթավորվել են, իսկ ավարտից հետո մասնակիցներին տրվել են սերտիֆիկատներ:

 

Երևանի 2800-ամյակի առթիվ նվիրված 2800 եղևնիները քաղաքային տնկարանում են

 

Երևանի 2800-ամյակի առթիվ Օստալբ շրջանից որպես նվեր ստացված 2800 եղևնիներն այժմ քաղաքային տնկարանում մշտական խնամքի ներքո են:
Մայրաքաղաքի 2800-ամյա հոբելյանին հրավիրված Գերմանիայի Բադեն-Վյուրթեմբերգ երկրամասի, Շվեբիշ-Գմյունդ քաղաքի և Օստալբ շրջանի պատվիրակությունն իր յուրօրինակ նվերն արեց Երևանին: Բնապահպանական նշանակությամբ նախաձեռնության նպատակը քաղաքին մնայուն հիշողություն թողնելն էր:
Խորհրդանշական 2800 եղևնիները որոշ ժամանակ անց քաղաքային տնկարանից կտեղափոխվեն ընդհանուր օգտագործման տարածքներ: Երևանի կանաչապատման գործում քաղաքային իշխանությունների վերաբերմունքը հստակ է. մայրաքաղաքի կանաչ կերպարը կփոխվի. արդեն այս տարի քաղաքի բնակիչներն ու հյուրերը նոր մոտեցումներ կտեսնեն կանաչապատման ոլորտում:

Հաղթանակ զբոսայգի - Սարալանջ հատվածի անտառվերականգնման և հիմնման աշխատանքները կմեկնարկվեն 2019թ.-ին:

 

էտվել է ավելի քան 8000 ծառ

 

Մարտի 5-ից մայրաքաղաքում մեկնարկած գարնանային էտն ավարտվել է ապրիլի 25-ին: Այս Երևանում էտվել է ավելի քան 8000 ծառ: Գործընթացը մասնագիտորեն հիմնավորված ու կանոնակարգված սկզբունքներով իրականացնելու նպատակով աշխատանքների մեկնարկից առաջ ոլորտի մասնագետները վարչական շրջանների կանաչապատման ընկերության աշխատակիցներին ներկայացրել էին այն հիմնական պահանջները, որոնք պետք է կիրառվեին էտի ժամանակ: Քաղաքապետարանի բնապահպանության վարչության պետ Խաչիկ Հակոբյանի խոսքով՝ խոր էտ արվել է բացառապես հիվանդ ու 60 տարեկանից բարձր տարիք ունեցող թեղի տեսակի ծառերի պարագայում: Միևնույն ժամանակ երիտասարդացման կամ խոր էտի են ենթարկվել նաև սև բարդիները, որոնք մակերեսային արմատների և բարձր սաղարթի պատճառով քամիների ժամանակ շատ խոցելի են: Շատ ծառեր էլ, մասնավորապես, Մյասնիկյան պողոտայի և Կիևյան փողոցի թեղիներն ու բարդիները հիվանդ են, ախտահարված, դրանց արմատային համակարգն ամբողջությամբ քայքայված է, ավելին, այդ ծառերը սպառել են իրենց կենսական տարիքը: Ի դեպ, գարնանային էտի ժամանակ հիմնականում պահպանվում է ծառերի ուղղաձիգ տեսքը: Խոր էտի ենթարկված ծառերը մշակվում են և սնուցվում օրգանական պարարտանյութով՝ կենսահումուսով, առատորեն ոռոգվում են, իսկ չորացած ծառերի հեռացումից հետո էլ տեղերում նոր ծառեր են տնկվում:

  Ծիծեռնակաբերդում և Սարալանջում բնաշիվային էտ է կազմակերպվել

 

13.04.2019 թ.-ին համաքաղաքային ծառատունկի ընթացքում Ծիծեռնակաբերդի և Սարալանջի 17 հա տարածքում, որտեղ առաջիկայում նախատեսված է անտառվերականգնում, կազմակերպվել է բնաշիվային էտ:
Աշխատանքներին մասնակցել են նաև Երևանի քաղաքապետի առաջին տեղակալ Հրաչյա Սարգսյանը, քաղաքապետարանի և վարչական շրջանների աշխատակիցները:
Էտված ճյուղերը տեղում մանրացվել են հատուկ սարքով և տեղափոխվել:

 

Մայրաքաղաքում ապրիլի 13-ին վաղ առավոտից մեկնարկել է համաքաղաքային ծառատունկը. տնկվել է 7500 ծառ և թուփ

 

Ապրիլի 13-ին համաքաղաքային ծառատունկի ժամանակ տնկվել է շուրջ 7500 ծառ և թուփ: Վարչական բոլոր շրջանների ծառապատ տարածքներում ու գլխավոր փողոցների և պողոտաների հարակից հատվածներում միաժամանակ իրականացվում է նաև որոշակի ծառատեսակների համալրում: Ծառատունկն իրականացվում է հասցեական ու բացառապես ոռոգման հնրավորություն ունեցող տարածքներում: 2019թ. ընդհանուր առմամբ Երևանում 7.5 կմ ոռոգման նոր ցանց կանցկացվի: Բնակիչների հետ միասին ծառատունկին մասնակցել են նաև տարբեր կազմակերպություններ:

 

Ապրիլի 22-ին` Երկրի օրվա առթիվ Երևանի քաղաքապետարանը «Ազգային ջրային համագործակցություն» գիտական բնապահպանական ՀԿ-ի հետ համատեղ Աջափնյակի Շիրազի 4/3 հասցեի հարակից այգում ծառատունկ էր կազմակերպվել: Հանգստի գոտին, ծառատունկին զուգահեռ, նաև մաքրվել է, արդիականացվել է ոռոգման համակարգը: 

Երկրի օրվա խորհուրդը նպատակ ունի հանրության և յուրաքանչյուր քաղաքացու ուշադրությունը սևեռել Երկրի և շրջակա միջավայրի խնդիրներին։

Օպերայի սրճարանները ապամոնտաժելուց հետո տարածքը բարեկարգվելու և կանաչապատվելու է։ Այնուհետև հայտարարվելու է բաց մրցույթ, արդյունքում՝ տարածքը կստանա իր վերջնական տեսքը։

 

 Թափառող շներն այլևս բիզնես չեն լինելու. քաղաքապետարանը ստեղծում է կենդանիների վնասազերծման իր կենտրոնը



Թափառող շները Երևանի բնակիչների համար իսկապես խնդիր են դարձել:
Դպրոց, մանկապարտեզ գնացող երեխաներն ու աշխատանքի շտապող ծնողներն ամեն օր ստիպված են կտրել անցնել անտուն շների օղակը:
Երևանի քաղաքապետարանը խնդրի մասին միայն վերջին 2 ամսում ստացել է ավելի քան 700 ահազանգ: Կան մշտական հասցեներ: Հիմնախնդիրը լուծելու համար նախատեսվում է ստեղծել «Թափառող կենդանիների վնասազերծման կենտրոն»:
Կենտրոնը կունենա անասնաբուժական կլինիկա և կացարան: Միջազգային լավագույն փորձը տեղայնացնելու համար Երևան կհրավիրվեն նաև օտարազգի մասնագետներ: Մայրաքաղաքի տարբեր հատվածներից մասնագիտացված մեքենաները շներին կտեղափոխեն կենտրոն: Տեղում մասնագետները կզննեն, կպատվաստեն, կբուժեն և կստերջացնեն կենդանիներին:
Անասնաբույժի ցուցումով շները կացարանում կմնան մի քանի ժամից մինչև մի քանի օր: Այնուհետ կհամարակալվեն և կհանձնվեն տարբեր ընտանիքների ու կազմակերպությունների խնամքին կամ բաց կթողնվեն նույն վայրեր:



2019-ին նախատեսվում է ստերջացնել թափառող էգ շների շուրջ 75 տոկոսը


Մայրաքաղաքում թափառող կենդանիների խնդիրներով այսուհետ կզբաղվի «Թափառող կենդանիների վնասազերծման կենտրոն» ՀՈԱԿ-ը: Երևանի ավագանին այսօր կայացած նիստում միաձայն հավանություն է տվել որոշման նախագծին: Ներկայացնելով Երևանի քաղաքապետի որոշմամբ ստեղծվող ՀՈԱԿ-ի նպատակները՝ բնապահպանության վարչության պետի ժ/պ Խաչիկ Հակոբյանը նշել է, որ կազմակերպությունը, համագործակցելով ոլորտի մասնագետների և մասնագիտացած միջազգային ու տեղական ՀԿ-ների հետ, համատեղ կմշակի և կիրականացնի թափառող կենդանիների հիմնախնդիրների լուծման տարաբնույթ ծրագրեր: Մասնավորապես, աշխատանքներ կտարվեն թափառող կենդանիների հավաքման, տեղափոխման, նախնական զննման, պատվաստման, ստերջացման, համարակալման և պահպանման նպատակով: Բացի այդ, գործընթացը կներառի նաև Երևանում առկա թափառող շների վիճակագրության, քարտեզագրման, նույնականացման և խնամքի ապահովում: Նշվել է նաև, որ մինչև համայնքային կլինիկայի կառուցումը, նախնական պայմանավորվածություն է ձեռք բերվել մի շարք անասնաբուժական կլինիկաների հետ՝ գործընթացը սկսելու վերաբերյալ:
Երևանի քաղաքապետարանը թափառող կենդանիների վերաբերյալ միայն վերջին 2 ամսում ստացել է ավելի քան 700 ահազանգ: Կատարված ուսումնասիրությունների համաձայն՝ մայրաքաղաքում այսօր թափառող կենդանիների թիվը հասել է 15-20 հազարի: Տարիներ շարունակ ոլորտում առկա խնդիրները լուծելու գործում ոչ հետևողական մոտեցումների պատճառով մայրաքաղաքում ստեղծվել է սուր իրավիճակ. ավելացել է անտուն շների քանակը, տեսակն էլ դարձել ավելի ագրեսիվ:
Այս տարի նախատեսվում է թափառող 6000 էգ շներից ստերջացնել 4500-ը, այսինքն` շուրջ 75 տոկոսը: Ողջունելով ՀՈԱԿ-ի ստեղծման նախաձեռնությունը և գործընթացն անմիջականորեն համայնքի կողմից իրականացնելն ու վերահսկելը՝ ավագանու անդամները համոզմունք են հայտնել, որ կյանքի կոչվող ծրագիրն իր կարևորությամբ կառանձնանա թե՛ կենդանիների, թե՛ քաղաքացիների համար:

 

 

  Երևանի քաղաքապետարանի աշխատակազմի բնապահպանության վարչություն