Մեկնարկել է ՀՀ երջանկահիշատակ վարչապետ Անդրանիկ Մարգարյանի հիշատակին նվիրված Հայաստանի Դուքենդո ֆեդերացիայի կողմից արդեն ավանդական դարձած հուշամրցաշարը: 10-րդ հոբելյանական հուշամրցաշարին այս տարի մասնակցում են շուրջ 800 մարզիկներ Երևանից և ՀՀ մարզերից:

Հուշամրցաշարի բացման հանդիսավոր արարողության ժամանակ Դուքենդո միջազգային ֆեդերացիայի նախագահ Գոռ Վարդանյանը, ողջունելով մասնակիցներին ու ներկաներին, շնորհակալություն է հայտնել Երևանի քաղաքապետարանին և Մարգարյան ընտանիքին՝ ֆեդերացիային մշտապես աջակցելու, ինչպես նաև հուշամրցաշարի կազմակերպման ու անցկացման գործում ունեցած ներդրման համար: Հայաստանի Դուքենդո ֆեդերացիայի նախագահ Հայկ Վարդանյանն էլ նշել է, որ ֆեդերացիայի սաներից յուրաքանչյուրն այսօր առաջնորդվում է Անդրանիկ Մարգարյանի գաղափարախոսությամբ և նրա՝ սերունդներին փոխանցած պատգամներով, նկատելով, որ դրա մեջ առաջնայինն, անշուշտ, հայրենասիրությունն է:
Հուշամրցաշարի շրջանակում տեղի է ունեցել նաև սև գոտիների հանձնման հանդիսավոր արարողություն: Ֆեդերացիայի 29 մարզիկներ արժանացել են սև գոտի բարձրագույն պարգևի:
Այնուհետ Դուքենդո Ավան մասնաճյուղի մարզիկները հանդես են եկել ցուցադրական ելույթներով:

Երևանի քաղաքապետարանի տեղեկատվության
և հասարակայնության հետ կապերի վարչություն