ԵՐԵՎԱՆԻ ՔԱՂԱՔԱՊԵՏԱՐԱՆ

ՊԱՇՏՈՆԱԿԱՆ ԿԱՅՔ

ընդլայնված որոնում

Ընտանիքի, կանանց և երեխաների իրավունքների պաշտպանություն

Բաժնի գործառույթները


2017 թվականին  նախատեսվող միջոցառումներ

 

Ս.թ. փետրվարին Երևան քաղաքում խնամատարության ինստիտուտի խրախուսման նպատակով նախատեսվում է անցկացնել սեմինար՝ խնամատար ընտանիքների մասնակցությամբ:
Ս.թ. մարտին քաղաքային մշակութային արժեքներին ծանոթացնելու նպատակով նախատեսվում է իրականացնել հատուկ կարիք ունեցող երեխաների այցելություն թանգարաններ:
Ս.թ. ապրիլին առողջ ապրելակերպի խրախուսման նպատակող նախատեսվում է իրականացնել հատուկ կարիք ունեցող երեխաների մասնակցությամբ արդեն ավանդույթ դարձած սպորտային միջոցառում:
Ս.թ. մայիսին Ընտանիքի միջազգային օրվան նվիրված հայ ավանդական ընտանիքի խրախուսման նպատակով նախատեսվում է իրականացնել մշակութային միջոցառում:
Ս.թ. հունիսի 1-ին Երեխաների պաշտպանության միջազգային օրվան նվիրված նախատեսվում է իրականացնել առանձնահատուկ պայմանների կարիք ունեցող երեխաների մասնակցությամբ համերգային միջոցառում, ինչպես նաև` այցելություններ Երևան քաղաքի ծննդատներ, մանկատներ:
Ս.թ. սեպտեմբերին նախատեսվում է կազմակերպել «Երևան Սիթի Տուր»` կյանքի դժվարին իրավիճակում հայտնված երեխաների մասնակցությամբ:
Ս.թ. դեկտեմբերին Հաշմանդամների միջազգային օրվան նվիրված նախատեսվում է կազմակերպել համերգային միջոցառում` հատուկ կարիք ունեցող երեխաների մասնակցությամբ:

 

 

Տարվա աշխատանքների ամփոփում՝ խնամակալության,
հոգաբարձության հանձնաժողովների մասնակցությամբ

Ս.թ. Նոյեմբերի 25-ին բաժնի նախաձեռնությամբ տեղի ունեցավ վարչական շրջանների խնամակալության և հոգաբարձության հանձնաժողովների ամփոփիչ նիստը, որտեղ քննարկվեցին տարաբնույթ խնդիրներ` կապված առանց ծնողական խնամքի մնացած, ինչպես նաև հակասոցիալական վարք դրսևորած երեխաների տեղավորման կողմնորոշման վերաբերյալ:
Աշխատանքների արդյունավետության բարձրացման նպատակով ներկայացվեցին առաջարկներ՝ իրավական ակտերում փոփոխություններ կատարելու վերաբերյալ:
Նիստին քննարկվեցին նաև փախստական երեխաներին առնչվող հարցեր, այդ հարցերի շուրջ պարզաբաննումներ տրվեցին «Սեյվ դը չիլդրեն ինթերնեշնլ» միջազգային հասարակական կազմակերպության կողմից:

 

Ամանորյա միջոցառում


Ս.թ. դեկտեմբերի 9-ին Ավանի մշակույթի տանը կայացավ ձեռքի աշխատանքների ցուցահանդես՝ հատուկ կարիք ունեցող երեխաների մասնակցությամբ: Միջոցառման ավարտին երեխաներին տրվեցին խրախուսական նվերներ:
Միջոցառմանը ներգրավված էին Երևանի հ.2, 6, 8, 11, 12, 14, 15, 16 հատուկ դպրոցների շուրջ 90 երեխա:

 

 

Սոցիալական տարբեր խմբերի ավելի քան 100 երեխա այցելել է Էրեբունի
պատմահնագիտական արգելոց-թանգարան

 

Երևան քաղաքում կյանքի դժվարին իրավիճակում հայտնված ընտանիքները և նրանց երեխաները մշտապես գտնվում են քաղաքապետարանի ուշադրության կենտրոնում։ Ընտանիքի, կանանց և երեխաների իրավունքների պաշտպանության բաժնի կողմից կազմակերպվող միջոցառումների նպատակներից մեկը այս երեխաներին հայրենասիրական ոգով դաստիարակելն է։ «Էրեբունի-Երևան 2798» միջոցառումների շրջանակում Աջափնյակ վարչական շրջանի երեխաների սոցիալական հոգածության կենտրոնի և Հանրապետական հ. 1 հատուկ կրթահամալիրի սաներն այցելել են Էրեբունի պատմահնագիտական արգելոց-թանգարան, շրջել ցուցասրահներով և ծանոթացել շուրջ 3-հազարամյա մայրաքաղաքի պատմությանը: Ծրագրում ընդգրկվել է ավելի քան 100 երեխա: Սա ևս մեկ ապացույց է, որ ոչ մի սոցիալական խումբ անմասն չի մնում քաղաքային մշակութային ծրագրերից:

 

Ճանաչողական այց՝ Կենդանաբանական այգի


Ս.թ. սեպտեմբերի 20-23–ին Երևանի քաղաքապետարանի աշխատակազմի ընտանիքի, կանանց և երեխաների իրավունքների պաշտպանության բաժինը կազմակերպել է կյանքի դժվարին իրավիճակներում գտնվող շուրջ 300 երեխաների այցելությունը Երևանի կենդանաբանական այգի։ Միջոցառմանը մասնակցում են Երևանի քաղաքապետարանի և ՀՀ կրթության և գիտության նախարարության ենթակայության հաստատություններում սովորող երեխաները։
Միջոցառման նպատակն էր երեխաների մեջ բնության նկատմամբ հետաքրքրության և սիրո զգացում սերմանելը։ Այցելության ընթացքում երեխաները ծանոթացան Կենդանաբանական այգու աշխատակիցների կողմից իրականացվող աշխատանքներին։ Կազմակերպիչների կարծիքով՝ ձեռք բերված գիտելիքները կարող են նպաստել հետագայում երեխաների մասնագիտության ընտրության գործում։

 

Կայացավ խնամակալության և հոգաբարձության հանձնաժողովի հերթական նիստը

 

Օգոստոսի 25-ին կայացավ խնամակալության և հոգաբարձության հանձնաժողովի հերթական նիստը՝ կյանքի դժվարին իրավիճակում հայտնված երեխաների և նրանց ընտանիքների խնդիրների աջակցության և իրավունքների պաշտպանության ուսումնասիրման նպատակով։

 

 Քննարկվել են խնամատար ինստիտուտի կայացման բարեփոխումների վերաբերյալ հարցեր

 

Երևանի քաղաքապետարանում բաժնի կողմից կազմակերպվել է հանդիպում-քննարկում՝ «Խոցելի երեխաների սոցիալական ներառում. այլընտրանքային խնամքի, ընտանիքի և ներառական կրթական ծառայությունների ընդլայնում» ծրագրի շրջանակում: ԱՄՆ Միջազգային զարգացման գործակալության և ՄԱԿ-ի Մանկական հիմնադրամի հետ համատեղ իրականացվող ծրագրի նպատակն է երեխայի խնամքի համակարգում ընթացող բարեփոխումների շրջանակում աջակցել ՀՀ կառավարությանը՝ երեխայի ընտանեկան միջավայրում ապրելու իրավունքն ու համայնքային սոցիալական և կրթական ծառայությունների մատչելիությունն ապահովելու գործում: Հանդիպմանը մասնակցել են քաղաքապետարանի համապատասխան ստորաբաժանումների, վարչական շրջանների խնամակալության և հոգաբարձության հանձնաժողովների ու սոցիալական աջակցության տարածքային բաժինների աշխատակիցներ, ինչպես նաև սոցիալական ապահովության նախարարության, ՀՀ Ոստիկանության անչափահասների գործերով բաժանմունքների, ՀԿ-ների, հատուկ դպրոցների և խնամքի հաստատությունների ներկայացուցիչներ:

 

 

Տոնական միջոցառում`«Առնո Բաբաջանյան» 

համերգասրահում

 

Երևանի քաղաքապետի տեղակալ Արամ Սուքիասյանը «Առնո Բաբաջանյան» համերգասրահում ներկա է գտնվել Երևանի քաղաքապետարանի աջակցությամբ «Նագաշյան մանուկների տուն» հաստատության կազմակերպած տոնական միջոցառմանը: Երեխաների պաշտպանության միջազգային օրվան նվիրված միջոցառմանը մասնակցել են երեխաների խնամքի և պաշտպանության հ. 2 գիշերօթիկ հաստատության, «ՍՕՍ-մանկական գյուղեր» մանկատան, հանրապետական հ. 1 հատուկ կրթահամալիրի, «Զատիկ» և ՀՕՖ-ի երեխաների աջակցության կենտրոնների, «Մարի Իզմիրլյանի անվան մանկատուն» ՊՈԱԿ-ի, Աջափնյակ վարչական շրջանի երեխաների սոցիալական հոգածության կենտրոնի շուրջ 200 երեխաներ։ Հանդիսությունն ուղեկցվել է երգ ու պարով:
Միջոցառման ավարտին բոլոր երեխաներին քաղաքապետի անունից հանձնվել են նվերներ:

 

 

Հունիսի 1-ի առաջին նվերները` օրվա նորածիններին ու նրանց մայրերին


Երեխաների պաշտպանության օրվա` հունիսի 1-ի առիթով առաջին նվերներն ստացել են Երևանի քաղաքապետարանի ենթակայությամբ գործող «Սուրբ Աստվածածին» և «Գրիգոր Նարեկացի» ծննդատներում լույս աշխարհ եկած փոքրիկներն ու նրանց մայրերը: Մայրացած կանանց քաղաքապետ Տարոն Մարգարյանի անունից շնորհավորել ու նվերներ է փոխանցել աշխատակազմի ընտանիքի, կանանց և երեխաների իրավունքների պաշտպանության բաժնի պետ Իդա Խաչատրյանը։ Մայրերն իրենց գոհունակությունն են հայտնել հաճելի անակնկալի, ուշադրության և հոգատարության համար։

 

 

 Ընտանիքի օրվան նվիրված միջոցառում` Ավան վարչական շրջանում


Ս.թ. մայիսի 17-ին Երևանի քաղաքապետարանի աշխատակազմի ընտանիքի, կանանց և երեխաների իրավունքների պաշտպանության բաժինը Ավան վարչական շրջանի կրթության, մշակույթի և սպորտի բաժնի հետ համատեղ Ավանի մշակույթի տանը կազմակերպել էր «Ընանիքի միջազգային օրվան» նվիրված շնորհալի երեխաների ձեռքի աշխատանքների ցուցահանդես` «Իմ ընտանիքը» խորագրով։ Ցուցահանդեսին մասնակցել են Երևանի հ. 2,6,12,17 հատուկ դպրոցների երեխաների, լսողության խանգարումներ ունեցող երեխաների կրթահամալիրի, խոսքի խանգարումներ ունեցող երեխաների և տեսողության խանգարումներ ունեցող երեխաների համալիրի սաները։ Ներկայացվել են հուլունքագործության, նկարչության, ասեղնագործության, գորգագործության աշխատանքներ։ Բոլոր մասնակիցներին Երևանի քաղաքապետարանի և Ավան վարչական շրջանի աշխատակազմի կողմից տրվեցին նվերներ։ Միջոցառման նպատակը առանձնահատուկ կարիք ունեցող երեխաներին մեկ անգամ ևս ուշադրության կենտրոնում պահելը և խրախուսելն էր:

 

 

Առողջ ապրելակերպ.ֆուտբոլի մրցաշար

 

Ս.թ. մայիսի 11,12,13 Երևանի քաղաքապետարանի աշխատակազմի ընտանիքի, կանանց և երեխաների իրավունքների պաշտպանության բաժնի և սպորտի բաժնի հետ համատեղ իրականացվում է ֆուտբոլի մրցաշար՝ առանձնահատուկ պայմանների կարիք ունեցող շուրջ 100 երեխայի մասնակցությամբ։
Միջոցառման նպատակն է առողջ ապրելակերպի ձևավորումը և խրախուսումը, հասարակության մեջ ինտեգրումը։
Միջոցառման մասնակիցները ոչ միայն Երևանի քաղաքապետարանի ենթակայության հատուկ դպրոցների, այլև ՀՀ սոցիալական ապահովության նախարարության և ՀՀ կրթության և գիտության նախարարությունների ենթակայության դպրոցների երեխաներն են։
Ս.թ. մայիսի 2-ին ներկայացված հայտերի հիման վրա կայացավ վիճակահանություն թիմերի միջև, որին մասնակցում էին հաստատությունների տնօրենները և մարզիչները, ինչպես նաև կազմակերպիչները։

 

Մեկնարկել է «Պտղի սեռի խտրական ընտրության դեմ պայքար» ծրագիրը

 

Մարտի 16-ին Երևանի քաղաքապետարանի խորհրդակցությունների դահլիճում կայացավ «Պտղի սեռի խտրական ընտրության դեմ պայքար» ծրագրով հրավիրված խորհրդատվական աշխատանքային խմբի առաջին հանդիպումը։ Ծրագիրն իրականացվում է «Մարդկային զարգացման միջազգային կենտրոնի» և մի շարք հասարակական կազմակերպությունների կողմից, ՀՀ առողջապահության և ՀՀ աշխատանքի և սոցիալական հարցերի նախարարությունների աջակցությամբ՝ «Մարդկային զարգացման միջազգային կենտրոնի» հետ կնքված եռակողմ համագործակցության հուշագրի հիման վրա։
Հանդիպումը կայացել է ընտանիքի, կանանց և երեխաների իրավունքների պաշտպանության բաժնի նախաձեռնությամբ, որին մասնակցել են քաղաքապետին կից գենդերային հարցերով հանձնաժողովի անդամները և Ավան, Արաբկիր, Էրեբունի, Նուբարաշեն, Քանաքեռ-Զեյթուն վարչական շրջանների գենդերային հարցերով զբաղվող մշտական աշխատանքային խմբերի անդամները։
Ծրագրի նպատակն է Երևանում կանանց և տղամարդկանց իրավահավասարության ապահովումը, տեղական ինքնակառավարման կառույցների, հասարակական կազմակերպությունների համագործակցության ընդլայնումը։



Քննարկվել են խնամակալության և հոգաբարձությանն առնչվող հարցեր

 

Երևանի քաղաքապետարանում տեղի է ունեցել աշխատանքային խորհրդակցություն` աշխատակազմի ընտանիքի, կանանց և երեխաների իրավունքների պաշտպանության բաժնի և մայրաքաղաքի վարչական շրջանների խնամակալության և հոգաբարձության հանձնաժողովների նախագահների մասնակցությամբ: Խորհրդակցությունը վարող Երևանի քաղաքապետարանի աշխատակազմի ընտանիքի, կանանց և երեխաների իրավունքների պաշտպանության բաժնի պետ Իդա Խաչատրյանը ներկայացրել է ՀՀ կառավարության որոշմամբ հաստատված երեխաների խնամքի տրամադրման, բնակչության սոցիալական պաշտպանության ընդհանուր տիպի և հատուկ հաստատություններ երեխաների որդեգրման կարգերում սահմանված` քաղաքապետարանի համապատասխան բաժնի և վարչական շրջաններում գործող հանձնաժողովների գործառույթները:
Քննարկման ընթացքում ներկայացվել են առաջարկներ համագործակցության մեխանիզմների հստակեցման և սոցիալական աջակցության բաժինների հետ աշխատանքային ձևաչափի մշակման վերաբերյալ:
Բաժնի կողմից առաջարկվել է կյանքի դժվարին իրավիճակներում հայտնված ընտանիքների հետ աշխատանքներում ներգրավել սոցիալական աջակցության բաժիններին՝ անհատական վերականգնողական աշխատանքների կազմակերպման նպատակով: Քննարկվել են նաև նախորդ տարվա ընթացքում ի հայտ եկած առանձին խնդիրներ, և նախանշվել են դրանց լուծման ուղիները:

 

 

 

Երևանի քաղաքապետարանի աշխատակազմի ընտանիքի, կանանց և

երեխաների իրավունքների պաշտպանության բաժին