Փակել
Ձևավորվել է կենդանաբանական այգու կառավարման խորհուրդ
Երևանի կենդանաբանական այգին այսուհետ ունի կառավարման խորհուրդ, որի հիմնական նպատակն է՝ մշակել զարգացման ռազմավարությունը, քաղաքապետին ներկայացնել մասնագիտական առաջարկություններ այգու գործունեության հիմնական ուղղությունների մասին, նաև վերահսկողություն սահմանել տնօրենի գործունեության նկատմամբ:
Խորհրդի նիստում հաստատվել է աշխատակարգը, քննարկվել այգու հիմնախնդիրներն ու գործունեությանն առնչվող մի շարք հարցեր: Մասնավորապես նշվել է, որ կձևավորվեն աշխատանքային խմբեր ըստ ենթաոլորտների՝ բնապահպանություն և գիտություն, իրազեկում և կրթություն, այգու կառուցվածք, կենդանաբուժություն, կենդանաբուծություն:
Նիստի ընթացքում փակ քվեարկությամբ կառավարման խորհրդի նախագահ է ընտրվել Բնության համաշխարհային հիմնադրամի հայաստանյան գրասենյակի տնօրեն, կենսաբանական գիտությունների թեկնածու Կարեն Մանվելյանը, փոխնախագահ՝ ՀՊՄՀ կենսաբանության, քիմիայի և նրանց դասավանդման մեթոդիկայի ամբիոնի վարիչ, կենսաբանական գիտությունների դոկտոր, պրոֆեսոր Սամվել Պիպոյանը:
Խորհրդի կազմում ընդգրկված են նաև Երևանի ավագանու անդամներ, շրջակա միջավայրի նախարարության, ինչպես նաև անասնաբուժության, կենսաբանության ոլորտների առաջատար մասնագետներ, պրոֆեսորներ, փորձագետներ ու այգու աշխատակիցներ:
Կառավարման խորհուրդը կշարունակի իր աշխատանքը՝ մշտապես ուշադրության կենտրոնում պահելով այգու խնդիրներն ու առաջնահերթությունները:
Լուսանկարներ
