Փակել
Հարգանքի տուրք՝ պաշարված Լենինգրադի զոհերի հիշատակին
ՌԴ հյուսիսային մայրաքաղաքում գտնվող Երևանի քաղաքապետ Տարոն Մարգարյանն այցելել է Պիսկարյովյան հուշահամալիր` մասնակցելու Բլոկադայի զոհերի հիշատակի օրվա հանդիսավոր արարողությանը: Սանկտ Պետերբուրգի նահանգապետ Գեորգի Պոլտավչենկոյի, ՌԴ հյուսիսային մայրաքաղաքի բարձրաստիճան այլ պաշտոնյաների, երևանյան պատվիրակության անդամների և բազմաթիվ պետերբուրգցիների հետ միասին քաղաքապետ Տարոն Մարգարյանը ծաղիկներ է խոնարհել պաշարված Լենինգրադում զոհվածների հիշատակը հավերժացնող Մայր հայրենիք հուշարձանին և հարգանքի տուրք մատուցել Բլոկադայի անմեղ զոհերի հիշատակին:
Հարկ է նշել, որ Պիսկարյովյան հուշահամալիրում են գտնվում Բլոկադայի ժամանակ զոհված ավելի քան 420 հազար լենինգրադցիների և 70 հազար զինվորների 186 եղբայրական գերեզմանները:
Երևանյան պատվիրակության անդամներն այցելել են նաև հուշահամալիրի արևելյան հատվածում գտնվող Հիշատակի ճեմուղի, որտեղ ծաղիկներ են խոնարհել Լենինգրադի պաշտպանության ժամանակ իրենց կյանքը զոհաբերած հայորդիների հիշատակը հավերժացնող հուշաքարին:
Երևանի քաղաքապետարանի տեղեկատվության
և հասարակայնության հետ կապերի վարչություն
