«Ինձ համար ամբողջ կյանքում գրադարանը եղել է երկրորդ հայրենի տունը, իսկ օտարության մեջ, մանավանդ Վենետիկում, առաջինը: Այն փաստը, որ իմ անունն է կրում քաղաքի առաջին մասսայական գրադարանը, անչափ ուրախացնում է ինձ: Ես միշտ գիրքը սրբություն եմ համարել, գրադարանը` յուրատեսակ սրբավայր: Ես կանեմ ամեն ինչ, որ Ձեր այս հրաշալի գրադարանում մշտապես զգացվի հայ բազմադարյան գրական շունչը: Ձեր գրադարանին մաղթում եմ երկար ու բարի ուղի, թող այն լինի հավիտյան, ինչպես որ հավիտյան է գիրքը»:
Ավետիք Իսահակյան
Ավետիք Իսահակյանի անվան կենտոնական գրադարանը հիմնադրվել է 1935 թ. օգոստոսի 15-ին, Ամիրյան 26 հասցեում՝ որպես Երևանի առաջին հանրային գրադարան: 1938 թ. բացվել է գրադարանի ընթերցասրահը՝ 1100 ընթերցողներով:
1955 թ. գրադարանն անվանակոչվում է Ավետիք Իսահակյանի անունով` Վարպետի ծննդյան 80-ամյակի առթիվ: 1964 թ. գրադարանում ստեղծվում է Մշակույթի ժողովրդական համալսարան` 4 ֆակուլտետներով: 1979 թ. Երքաղխորհրդի գործկոմի մայիսի 16-ի որոշմամբ զանգվածային գրադարանների հենքով ստեղծվում է Երևանի մեծահասակներին սպասարկող գրադարանների կենտրոնացված համակարգը` ԳԿՀ, որի կենտրոնական գրադարան է դառնում Ավետիք Իսահակյանի անվան գրադրանը՝ 47 գրադարան-մասնաճյուղերով:
1993 թ. բացվում են գրադարանի արվեստի, մամուլի, օտար լեզվի և տեխնիկական գրականության բաժինները և Ավ. Իսահակյանի անվան հանդիսությունների դահլիճը:
1995 թ. Երքաղխորհրդի գործկոմի դեկտեմբերի 22-ի որոշմամբ միավորվում են մեծահասակներին /ԳԿՀ/ և երեխաներին /ՄԳԿՀ/ սպասարկող գրադարանների կենտրոնացված համակարգերը, և Ավ. Իսահակյանի անվան գրադարանը դառնում է միավորված համակարգի կենտրոնական գրադարան:
1998 թ. Երևանի քաղաքապետարանի հոկտեմբերի 27-ի որոշմամբ գրադարանը դառնում է համայնքային գրադարանների համար մեթոդ-մատենագիտական համակարգող կենտրոն:
2002 թ. ՀՀ կառավարության նոյեմբերի 28-ի որոշմամբ Ավ. Իսահակյանի անվան գրադարանը վերակազմակերպվում է «Ավետիք Իսահակյանի անվան ԿԳ» ՊՈԱԿ-ի` 7 գրադարան-մասնաճյուղերով:
Ավ. Իսահակյանի անվան կենտրոնական գրադարանում պարբերաբար կազմակերպվում են «Պատանի և երիտասարդ ստեղծագործողների և կատարողների» հանրապետական մրցույթ-փառատոներ, «Նռան հատիկ» հանրապետական մանկապատանեկան թատերական փառատոնը (2000 թ.-ից)՝ «Նախաբեմ» կրթամշակութային ասոցիացիայի հետ համատեղ, «Ազգային գրադարանային շաբաթ» միջոցառումների շարքը:
2005 թ. առաջին անգամ Հայաստանում գրադարանում հիմնադրվում է «Ամերիկյան անկյունը»` ՀՀ-ում ԱՄՆ դեսպանության աջակցությամբ, իսկ 2008 թ.-ից՝ «Բրիտանական կենտրոնը»՝ ՀՀ-ում գործող «Բրիտանական խորհրդի» աջակցությամբ: Անկյունները պարբերաբար համալրվում են նոր գրականությամբ, հագեցած են տեղեկատվական ժամանակակից սարքավորումներով, ապահովում են էլեկտրոնային պարբերականների բաժանորդագրություն և անվճար համացանցային ծառայություններ: 2019 թ.-ից «Ամերիկյան անկյունում» գործում է նաև «ՏեխնոԼաբ» ենթաբաժինը:
Երևանի քաղաքապետարանի և Ֆրանկոֆոնիայի միջազգային կազմակերպության համագործակցության շնորհիվ գրադարանում գործում է «Ֆրանկոֆոնիայի կենտրոն» բաժինը, որը հագեցած է տեղեկատվական ժամանակակից սարքավորումներով, ֆրանսերեն մեծարժեք գրականությամբ և էլեկտրոնային այլ բազաներով:
2011 թ. Կենտրոնական գրադարանը ՀՀ-ում առաջինը ավարտում է ֆոնդերի մուտքագրումը՝ «Ալեֆ» ծրագրով, ներդրվում է էլէկտրոնային գրադարանների «ԷԼԳՐԱԴ» համակարգը` 2 ենթահամակարգերով: 2012 թ. գրադարանում սկսվում է /ՀՀ-ում հանրային գրադարաններից առաջինը/ ընթերցողների էլեկտրոնային սպասարկում և իրականացվում է գրադարանային գործառույթների ավտոմատացում:
Ավ․ Իսահակյանի անվան կենտրոնական գրադարանը համագործակցում է Սանկտ-Պետերբուրգի Վ.Վ․ Մայակովսկու անվան կենտրոնական և Մ․ Յու․ Լերմոնտովի անվան միջշրջանային գրադարանների, Մոսկվայի «Կենտրոնական վարչական շրջանի կենտրոնացված գրադարանային համակարգի» հետ: Ունի հուշագրեր Իսպանիայի հայկական համայնքի «Արարատ» միության, Ֆրանսիայի Լիոն քաղաքի քաղաքային գրադարանների հետ: Ոլորտային համագործակցության հուշագրեր են կնքվել նաև Լոռու և Շիրակի մարզային գրադարանների հետ:
2021 թ. Ավ. Իսահակյանի անվան քաղաքային գրադարանը հաղթող է ճանաչվել ՀՀ ԿԳՄՍ նախարարության և «Հայկական գրադարանային ասոցիացիա» ՀԿ-ի կողմից կազմակերպված «Լավագույն գրադարան» մրցույթի «Լավագույն նորարար գրադարան» անվանակարգում:
2022 թ․ ՀՀ ԿԳՄՍ նախարարի 2022 թվականի հուլիսի 7-ի N 1245-Ա հրամանով 5 տարի ժամկետով հանրային գրադարանի կարգավիճակ է ստացել Երևանի «Ավ. Իսահակյանի անվան Կենտրոնական գրադարան» ՀՈԱԿ-ը:
Ավ. Իսահակյանի անվան գրադարանը «Հայաստանի գրադարանների կոնսորցիումի» հիմնադիր անդամներից մեկն է:
Տնօրենի ժ/պ` Ռուզաննա Բարսեղյան
Աշխատանքային ժամեր՝ երկուշաբթիից ուրբաթ, ժ. 9։00 - 17։00
Հասցեներ՝
Կենտրոն գրադարան՝ Նալբանդյան 4/1
Թիվ 15 մասնաճյուղ՝ Սայաթ-Նովա 37
Թիվ 21 մասնաճյուղ` Բաղրամյան 20
Թիվ 27 մասնաճյուղ` Նորքի 5-րդ փողոց, 65 ԱՀԿ շենք
Թիվ 28 մասնաճյուղ` Մամիկոնյանց 21
Թիվ 29 մասնաճյուղ` Կոմիտաս 6
Թիվ 33 մասնաճյուղ` Կիևյան 1
Թիվ 36 մասնաճյուղ` Ն. Զարյան 19
Հեռախոս՝ +37410 589 610
Կայք՝ www.isahakyanlibrary.am