ԵՐԵՎԱՆԻ ՔԱՂԱՔԱՊԵՏԱՐԱՆ

ՊԱՇՏՈՆԱԿԱՆ ԿԱՅՔ

ընդլայնված որոնում

Ավտոտնակների ու զավթված տարածքների փոխարեն՝ նոր բակեր. ընթացքում են վարչական շրջանների ծրագրերը

20.06.2022

Յոթ ավտոտնակի ու ցանկապատերով զավթած տարածքի փոխարեն բարեկարգ բակ՝ խաղահրապարակով, հանգստի առանձին գոտով: Շենգավիթում, վարչական շրջանի զարգացման այս տարվա ծրագրով, կբարեկարգվի, կկահավորվի ու կլուսավորվի 30 բակ:

«Այս տարի աննախադեպ մեծ ծավալի աշխատանք է իրականացվելու, ավելի շատ, քան նախկին 20 տարում: Մեր մոտեցումը հետևյալն է. եթե կան բակային տարածքներ, որոնք զավթած են եղել, կան ավտոտնակներ, որոնցից բակի բնակիչները պատրաստակամ կլինեն հրաժարվել, հանել ավտոտնակները, մենք պարտավորվում ենք այդ բակը բարեկարգել»,-ասում է Շենգավիթ վարչական շրջանի ղեկավար Ռազմիկ Մկրտչյանը:
Վարչական շրջանի համաչափ զարգացման համար հատուկ ուշադրության են արժանի ծայրամասային՝ մասնավոր տներով բնակեցված հատվածները: Ներքին Չարբախում կառուցված նոր այգին բռնցքամարտիկ Արթուր Աբրահամի նախաձեռնությունն է, որին միացել է վարչական շրջանը: Սա թաղամասի առաջին ու առայժմ միակ հանգստի գոտին է:
«Ներքին Չարբախում այգի չունեինք, բացի այդ, այս տարածքն ամբողջովին աղբածածկ էր: Ես էլ եմ այստեղ մեծացել, գիտեմ, որ երեխաների համար տեղ չկար խաղալու, զբաղվելու: Դրա համար էլ որոշեցի մի բանով օգտակար լինել իմ ժողովրդին»,-նշում է բռնցքամարտի աշխարհի չեմպիոն Արթուր Աբրահամը:
Շենգավիթի բակային տարածքներում կառուցվում են նաև ֆուտբոլի նոր խաղադաշտեր: Մեկնարկել է նաև բակերի ու փողոցների ասֆալտբետոնե ծածկի նորոգումը: Ներքին Շենգավիթ 13-րդ փողոցը երբևէ ասֆալտապատ չի եղել, թեև վարորդների համար այս ճանապարհը շրջանցիկ, կարևոր հատված էր:
«Ավելի մեծ ուշադրություն ենք դարձնելու այն հատվածներին, որտեղ տասնամյակներում ոչինչ չի արվել»,-ընդգծում է Ռազմիկ Մկրտչյանը:
Թեքահարթակների կառուցում, գետնանցումների հարմարեցում. Շենգավիթում կլուծվի նաև հենաշարժողական խնդիրներով բնակիչների հարմարավետ տեղաշարժի խնդիրը:
Ապրիլին ուժեղ քամին Նոր Նորքում գետնին էր տապալել Գալշոյան 32 շենքի տանիքը: Այժմ վարչական շրջանը սկսել է նորի կառուցումը: Ժամանակին բնակիչների կողմից հարթը թեք դարձրած այդ տանիքի փոխարեն կհավաքվի թիթեղյա նոր, թեք ու ամուր տանիք:

Լուսանկարներ
x

Alternative content

Get Adobe Flash player

x