Փակել
Հմտությունների զարգացում՝ համայնքային ծառայողների համար
Երևանի քաղաքապետարանը ՄԱԿ-ի զարգացման ծրագրի հայաստանյան գրասենյակի հետ այս տարի իրականացրեց աշխատակիցների վերապատրաստման միանգամից մի քանի ծրագիր:
«Երևան 2.0: Դեպի ավելի ընդգրկուն և կանաչ վերականգնում» ծրագրի աջակցությամբ համայնքային ծառայողները հնարավորություն են ունեցել զարգացնել հմտությունները:
Երևանի քաղաքապետի խորհրդական Մերի Մարգարյանը, հանձնելով հավաստագրերը, ընդգծել է, որ անընդհատ զարգացող աշխարհում շարունակական կրթությունը կարևոր հիմնաքար է և ցանկացած կառույցի հաջողության գրավականն առաջին հերթին գիտելիքներով զինված մասնագետների առկայությունն է, այդ իսկ պատճառով էլ անհրաժեշտություն է առաջանում այս գործընթացները դարձնել շարունակական:
«Շատ շուտով Երևանի քաղաքապետարանը կունենա վերապատրաստման թվային հարթակ, որտեղ կլինի համապատասխան առցանց դասընթացների մասնակցելու հնարավորություն՝ մասնագիտականից մինչև մոտիվացնող: Յուրաքանչյուր աշխատակից կարող է նաև զբաղվել ինքնակրթմամբ՝ օգտվելով կայքում տեղադրված նյութերից, գրականությունից և տեսադասընթացներից: Այս ընթացքում նաև աշխատակազմը մասնակցում է միջազգային լավագույն առցանց դասընթացներին և ամեն օր համագործակցության շրջանակը ընդլայնվում է»,-նշել է Մերի Մարգարյանը:
Նշենք, որ քաղաքապետարանի աշխատակազմի գնահատման ու վերապատրաստման ծրագրում ընդգրկված էր հարյուրից ավելի աշխատակից: Մարդկային ռեսուրսների կառավարման ոլորտում համայնքը մտադիր է շարունակել բարեփոխման ծրագրերը:
Լուսանկարներ
