Փակել
Մայրաքաղաքում անցկացվում են «Երևանի գինու օրերը»
Երևանի հիմնադրման 2800-այմակի հոբելյանական միջոցառումների ծրագրով արդեն 2-րդ տարին անընդմեջ Սարյան փողոցում մեկնարկել է «Երևանի գինու օրեր» միջոցառումը: Այն կազմակերպել է «Էվենտտուրա» ընկերությունը՝ Երևանի քաղաքապետարանի, ՀՀ տնտեսական զարգացման և ներդրումների նախարարության Զբոսաշրջության պետական կոմիտեի, Հայաստանի զբոսաշրջության զարգացման հիմնադրամի, ինչպես նաև «Ջի-Այ-Զեթ Հայաստան» կազմակերպության աջակցությամբ: Միջոցառմանը, ի թիվս բազմաթիվ այլ հյուրերի, ներկա են եղել Երևանի քաղաքապետի օգնական Մարիա Բարաղամյանը, քաղաքապետարանի աշխատակազմի մշակույթի վարչության պետ Ռուբեն Հովհաննիսյանը, աշխատակազմի տուրիզմի բաժնի պետ Գևորգ Օրբելյանը:
Միջոցառմանը ներկա բազմաթիվ զբոսաշրջիկների համար սա ևս մեկ առիթ էր բացահայտելու մայրաքաղաքի գրավչությունն ու հետաքրքիր, յուրահատուկ մթնոլորտը:
Կարևորելով միջոցառման անցկացումը մայրաքաղաքում զբոսաշրջության զարգացման տեսանկյունից՝ Երևանի քաղաքապետի օգնական Մարիա Բարաղամյանը նշել է. «Երևանի քաղաքապետարանն իր բազմաթիվ միջոցառումներում անպայման ներառում է զբոսաշրջային բաղադրիչը, քանի որ մայրաքաղաքում զբոսաշրջության զարգացումը առանցքային նշանակություն ունի: «Երևանի գինու օրեր» միջոցառումը մեր համաքաղաքացիներին և մայրաքաղաքի հյուրերին ներկայացնում է Հայաստանի գինեգործության լավագույն ավանդույթները, և իհարկե, միաժամանակ, մեր մշակույթն ու ավանդույթները»:
Միջոցառման հյուրերը հնարավորություն են ունեցել շրջելու ավելի քան 50 տաղավարներում, ծանոթանալու ինչպես գինու, այնպես էլ տարատեսակ խորտիկների տեսականուն: 32 գինեգործական տաղավարներում ներկայացված է եղել գինու ավելի քան 200 տեսակ: Միջոցառմանը մասնակցել է նաև Արցախի Հանրապետության գինեգործական 5 ընկերություն: Իսկ մյուս տաղավարներում հյուրերը համտեսել են մայրաքաղաքի ռեստորանների և սրճարանների կողմից առաջարկվող հայկական և արտերկրի խոհանոցի բազմատեսակ ուտեստներ:
Նշենք, որ միջոցառումն ուղեկցվել է բազմաժանր շոու-ծրագրով՝ սիրված նվագախմբերի և DJ-ների մասնակցությամբ: Ուրախ երաժշտությունն ապահովել է մասնակիցների բարձր տրամադրությունը, իսկ փոքրիկ, սակայն հետաքրքիր ֆլեշ-մոբերն ապահովել են հյուրերի հետաքրքիր ժամանցը:
«Երևանի գինու օրեր» միջոցառումը կամփոփվի այսօր՝ երեկոյան:
Երևանի քաղաքապետարանի տեղեկատվության
և հասարակայնության հետ կապերի վարչություն
Լուսանկարներ
