ԵՐԵՎԱՆԻ ՔԱՂԱՔԱՊԵՏԱՐԱՆ

ՊԱՇՏՈՆԱԿԱՆ ԿԱՅՔ

ընդլայնված որոնում

«Մեր բոլոր մրցույթները հիմնավոր անհրաժեշտություն են»

06.05.2019

Նոր ճանապարհների կառուցում, հիմնանորոգում, կանաչ գոտիների վերականգնում, կրթամշակութային և առողջապահական միջոցառումներ: Քաղաքի ու բնակիչների համար կարևոր ամեն մի ծրագիր, նախքան իրագործումն անցնում է երկար ճանապարհ: Բոլոր աշխատանքների, ծառայությունների և ապրանքների ձեռքբերման համար քաղաքապետարանն անցկացնում է մրցույթներ: 

 

Ովքե՞ր և ինչպե՞ս կարող են մասնակցել մրցույթներին


«Քաղաքապետարանի կողմից հայտարարվող գնման գործընթացներին կարող է մասնակցել ցանկացած ոք, ով գրանցված է էլեկտրոնային գնումների Armeps համակարգում: Գրանցվելուց հետո մասնակիցը բեռնում է հրավերը, լրացնում հրավերով սահմանված փաստաթղթերը և ներբեռնում դրանք համակարգ: Հայտերը բացվում են սահմանված օրը՝ գնահատող հանձնաժողովի ներկայությամբ: Առավելությունը տրվում է նվազագույն գին առաջարկած մասնակցին»,-նշում է Երևանի քաղաքապետարանի գնումների վարչության պետ Էդգար Կիրակոսյանը:
Այս տարի քաղաքապետարանը հայտարարել է ավելի քան 640 մրցույթ: Դրանցից 440-ն արդեն ամփոփվել են: Տնտեսվել է 1 մլրդ, 255 մլն դրամ: Մրցույթների մի մասը պայմանագրերի կնքման փուլում է, իսկ մի մասը՝ հայտարարված է կամ կհայտարարվի:
Երևանի քաղաքապետարանի կողմից հայտարարվող գնման ընթացակարգերն ամբողջությամբ էլեկտրոնային են: Մրցույթներին կարելի է ծանոթանալ քաղաքապետարանի www.yerevan.am պաշտոնական կայքում, ինչպես նաև www.armeps.am և http://gnumner.am/ կայքերում:
Մրցույթները բաց են բոլորի համար: Չնայած դրան՝ մասնակցության ցանկություն են հայտնում ոչ բոլորը:
Փոխքաղաքապետ Հայկ Սարգսյանը մասնակցության ցածր ցուցանիշի մի քանի պատճառ է տեսնում: Առաջինն ըստ նրա՝ պահանջների խստացումն է, որն արվել է հօգուտ մասնակիցների:
«Վերջին 6 ամիսների ընթացքում Երևանի գնումների համակարգում փոփոխվել են մոտեցումները, էապես խստացվել են գնումներով կնքվող պայմանագրային պարտավորությունների կատարման նկատմամբ հսկողության մեխանիզմներն ու գործիքները: Հնարավոր չեն այլևս դեպքեր, երբ դուք 100 մլն դրամ արժեցող մրցույթում կհաղթեք 20 մլն-ով: Այնուհետ 10 մլն-ով կատարելու դեպքում կստորագրվի ընդունման-հանձնման ակտ՝ իբր, աշխատանքը կատարվել է պահանջներին բավարար»,-ընդգծում է քաղաքապետի տեղակալ Հայկ Սարգսյանը:
Մեկ այլ խնդիր են մրցութային բնութագրերը: Խնդրի մասին բարձրաձայնում էին նաև ավագանու անդամները:
«Հայաստանի տնտեսությունը մեծ չէ, և յուրաքանչյուր ոլորտում կան սահմանափակ քանակությամբ մասնակիցներ, և այդ մասնակիցներից բոլորը պետք է հնարավորություն ունենան մասնակցություն ցուցաբերել և նրանց հետ է անհրաժեշտ քննարկել տեխնիկական բնութագրերը: Մենք մի դրվագով քննարկում ենք ունեցել աղբահավաք մեքենաների տեխնիկական բնութագրերի առիթով: Եթե դրանք նեղացնում են շրջանակը, բնականաբար, ավելի քիչ կազմակերպություն է մասնակցում»,-նշում է Դավիթ Խաժակյանը:
«Բավական աշխատանք ենք տարել մրցույթների բնութագրերը փոփոխելու նպատակով, որովհետև շատ բնութագրեր կարված էին կոնկրետ սուբյեկտների, այսպես ասած, «հագով»: Ահռելի ժամանակ է պահանջվում, որպեսզի բնութագրերը փոխես, դարձնես ավելի օբյեկտիվ: Արդյունքում՝ դանդաղում են պրոցեսները»,-նկատում է Հայկ Սարգսյանը:
Մրցույթների ոչ ժամանակին կազմակերպման և անցկացման հետևանքով ուշանում են քաղաքային աշխատանքները: Այս մասին վերջերս բարձրաձայնեց նաև քաղաքապետը. «Եթե ունենք «վառվող» մրցույթներ, ուրեմն հնարավորին սեղմ ժամկետում պետք է կնքվի պայմանգիրը և աշխատանքներն սկսեն»:
Երևանի ավագանու անդամ Դավիթ Խաժակյանը գնումների գործընթացում որպես հիմնական խնդիր մատնանշում է մրցույթների ժամանակացույցը:
«Օրինակ, այսօր փոսալցման աշխատանքներ չեն իրականացվում: Խնդիրը այն է, որ չափազանց ուշ մրցույթը հայտարարվեց՝ մարտ ամսվա մեջ, և, բնականաբար, հաշվի առնելով բողոքարկման ժամկետները, այն էլ ավելի երկարեց: Եթե շուտ հայտարարվեր, բնականաբար, հնարավորություն կունենայինք ավելի շուտ իրականացնել»,-նշում է Դավիթ Խաժակյանը:
«Մրցույթները, այդ թվում՝ ասֆալտապատման, հայտարարված են եղել դեռևս դեկտեմբերին: Մի դեպքում մասնակից չի լինում, 2-րդ դեպքում լինում է մասնակից, բայց հաղթողը սխալ է լրացրել հայտը, և օրենքով սահմանված կարգով մենք մերժում ենք: Երբ ժամկետները գումարում ենք, ապա մեկ միջին վիճակագրական բաց մրցույթը կայանում է մինչև 2 ամիս ժամակահատվածով: Եվ եթե այն չի կայանում, նշանակում է, որ ևս 2 ամսով կերկարաձգվի»,-պատասխանում է Հայկ Սարգսյանը:
Այս տարի ավելի քան 100 մրցույթ չեղարկվեց և նորից տեղադրվեց՝ մրցույթների էլեկտրոնային համակարգի խափանման պատճառով: Խնդիրը, թերևս, քաղաքապետարանի գործառույթներից դուրս էր:
Գնման գործընթացներում խնդիրները շատ են, լուծումները՝ ժամանակատար: Որևէ գործընթաց համայնքն ինքուրույնաբար արագացնել առայժմ չի կարող. օրենսդրությունը չի թույլատրում:
Հենց այդ պատճառով էլ քաղաքապետարանը երբեմն դիմում է նաև մեկ անձից գնման տարբերակին, որը մի քանի անգամ ավելի արագ է:
«Եթե մենք գործառույթն այնպես ենք պլանավորում, որ չենք կարողանում իրականացնել, հասնում ենք մի կրիտիկական վիճակի և որոշում ենք մեկ անձով գնում անել, ապա դեռևս չի նշանակում, որ դա արդարացված է»,-ասում է Դավիթ Խաժակյանը:
«Մեր բոլոր մրցույթները ոչ միայն արդարացված, այլև հիմնավոր անհրաժեշտություն են: Մեկ անձից գնման հիմքում ընկած է բացառապես գործընթացների հրատապությունը, դրանց հանրային կարևորությունը և այլընտրանքի բացակայությունը: Նույն մեքենաների պարագայում կա հանրային անհրաժեշտություն»,-նշում է Հայկ Սարգսյանը:
Մրցույթների գործընթացի ժամկետների, հրատապության սահմանումների, բնութագրերի և օրենսդրական մի շարք այլ փոփոխությունների քաղաքապետարանի փաթեթը գրեթե պատրաստ է: Կառավարությունը ևս քննարկում է գնումների ոլորտի խնդիրներն ու փոփոխություններ նախատեսում:

Նախքան օրենսդրական կարգավորումները՝ մրցութներին ակտիվ մասնակցություն ապահովելու համար և որպեսզի միաժամանակ քաղաքային ծրագրերը հետ չընկնեն, Երևանի քաղաքապետարանի աշխատակազմը պարբերաբար հանդիպում է նաև տարբեր ոլորտներում գործունեություն ծավալող ընկերությունների ներկայացուցիչների հետ: 

Մրցույթների մասին հանրային իրազեկումը բարձրացնելու նպատակով քաղաքապետարանը հայտարարությունների մասին քաղաքացիներին կտեղեկացնի ոչ միայն լրատվամիջոցներով, այլև՝ սոցիալական ցանցեով:
Քաղաքային իշխանության նպատակն է՝ գնումների գործընթացը կազմակերպել թափանցիկ՝ միևնույն ժամանակ ապահովելով քաղաքի կայուն զարգացումը:

Լուսանկարներ
x

Alternative content

Get Adobe Flash player