Փակել
«Վավերագրելով պատմությունը». նոր ցուցահանդես՝ նվիրված հեռուստատեսության 65-ամյակին
Երևանի պատմության թանգարանում բացվել է «Վավերագրելով պատմությունը» խորագրով լուսանկարների ցուցահանդեսը: Ցուցադրությունը կազմվել է Հանրային հեռուստաընկերության արխիվի բացառիկ կադրերից: Ցուցահանդեսն էլ նվիրված է հայկական հեռուստատեսության 65-ամյա հոբելյանին:
«Մարտիրոս Սարյան, Ալեքսանդր Թամանյան, Միքայել Մազմանյան. սա մեր ամենահին լուսանկարներից է, ավելի ճիշտ՝ տեսանյութից կադր: Մարդիկ պետք է իմանան, որ նման մեծությունների մասին հանրայինն ունի արխիվ: Շատ կարևոր է, որ այդ արխիվը բացենք և ներկայացնենք մեր հանրությանը»,- նշում է Հայաստանի հանրային հեռուստաընկերության գործադիր տնօրեն Հովհաննես Մովսիսյանը:
Եթերում ու եթերից դուրս արված ամեն մի կադր մի ամբողջ պատմություն է ու ժամանակաշրջան: Նկարների մեծ մասը հանրությունը կտեսնի առաջին անգամ, այդ թվում ինչպես հեռուստատեսության, այնպես էլ գիտության, արվեստի, գրականության ու կինոյի մեծերին: Պահի արժեքով բացառիկ լուսանկարները Երևանի պատմության հեռուստատեսային էջն են:
Ցուցահանդեսը Երևանի պատմության թանգարանում կլինի ևս երեք օր, այցելուների մուտքն էլ ազատ:
