Դեռևս ամիսներ առաջ պաշտոնական նամակով Երևանի գլխավոր ճարտարապետ Տիգրան Բարսեղյանին էր դիմել ՌԴ Սանկտ Պետերբուրգ քաղաքի «Ասպո» նախագծային ինստիտուտի գլխավոր տնօրեն Յակով Բերեզինը` հանդիպման խնդրանքով: Վերջինս տեղեկացրել էր, որ ՌԴ նախագծային ինստիտուտների տնօրեններից, ճարտարապետներից, ճարտարագետներից կազմված 16 հոգանոց պատվիրակության անդամները Վրաստան և Հայաստան նախատեսված այցի շրջանակում ցանկություն են հայտնել ծանոթանալ կովկասյան 2 պետությունների ճարտարապետությանը, ինչպես նաև հանդիպումներ ունենալ մայրաքաղաքների գլխավոր ճարտարապետների հետ:
Ռուսական պատվիրակության անդամներին Երևանում հյուրընկալել է Երևանի գլխավոր ճարտարապետ Տիգրան Բարսեղյանը: Հանդիպմանը մասնակցել են նաև Հայաստանի ճարտարապետների միության նախագահ Մկրտիչ Մինասյանը, Ճարտարապետների միության նախագահի տեղակալ Ալեքսանդր Բադալյանը, Շինարարների միության տնօրեն Գուրգեն Մինասյանը: Ողջունելով հյուրերին` Երևանի գլխավոր ճարտարապետ Տիգրան Բարսեղյանը ներկայացրել է հայկական ճարտարապետության համառոտ նկարագիրը: Պատվիրակության անդամների խնդրանքով անդրադարձ է կատարվել մայրաքաղաքում տարբեր տարիներին կյանքի կոչված ճարտարապետական կառույցների պատմությանը, արդի ճարտարապետության մեջ կիրառվող նորամուծություններին, այս ոլորտում մասնավոր և պետական կառույցների համագործակցությանը, ներդրումային ծրագրերին, ինչպես նաև շենքերի նախագծման գործընթացում ճարտարապետների դերին: Քննարկվել են նաև ոլորտի ռուսական ընկերությունների հետ եղած փոխգործակցությունն ու նաև փորձի փոխանակման նպատակով հնարավոր ծրագրերն ու անելիքները: Պատվիրակության անդամները շնորհակալություն են հայտնել ջերմ ընդունելության համար և նշել, որ հանդիպման ընթացքում մասնավորապես երևանյան ճարտարապետությանն առնչվող քննարկումները մասնագիտական տեսակետից անչափ նպաստավոր էին:

Երևանի քաղաքապետարանի տեղեկատվության
և հասարակայնության հետ կապերի վարչություն