Երեխաների և սոցիալական պաշտպանության վարչության 2025թ. գործունեությունը

Երևանի քաղաքապետարանի աշխատակազմի երեխաների և սոցիալական պաշտպանության վարչությունը, համագործակցել է ՀՀ աշխատանքի և սոցիալական հարցերի, տարածքային կառավարման և ենթակառուցվածքների, արդարադատության, ներքին գործերի նախարարությունների, վարչական շրջանների ղեկավարների աշխատակազմերի, միասնական սոցիալական ծառայության տարածքային կենտրոնների, մանկատների, երեխաների խնամքի և աջակցության կենտրոնների, ինչպես նաև ոլորտում ակտիվ գործունեություն ծավալող կազմակերպությունների հետ: 
Վարչության գործառույթներին առնչվող խնդիրների վերաբերյալ խորհրդատվություն է տրամադրվել քաղաքացիներին:
Վարչության կողմից իրականացվել են այցեր վարչական շրջանների ղեկավարների աշխատակազմերի երեխաների և սոցիալական պաշտպանության բաժիններ՝ բազմաշերտ դեպքերի, իրականացվող աշխատանքների, ծրագրերի վերահսկողության, սուպերվիզիայի իրականացման նպատակով: Իրականացվել է մեթոդական համակարգում: 
Վարչության կողմից վերահսկողական այցեր են կատարվել ՀԿ-ներ, որոնց վարչության կողմից տրամադրվել է դրամական աջակցություն՝ խոցելի խմբերին ծառայություններ մատուցելու նպատակով:
Կազմակերպվել են շահառուների ընդունելություններ, գնահատվել են կարիքներ, տրամադրվել համապատասխան խորհրդատվություն և հանձնարարականներ՝ վարչական շրջանների ղեկավարների աշխատակազմերի համապատասխան բաժիններին: 
Վարչության աշխատակիցները մասնակցել են տարբեր քննարկումների, հանդիպումների և դասընթացների, պարբերաբար իրականացվել են հանդիպում-քննարկումներ վարչական շրջանների երեխաների և սոցիալական պաշտպանության բաժինների հետ՝ աշխատանքների արդյունավետության բարձրացման նպատակով:

Սոցիալական պաշտպանության ոլորտ
Հասարակական կազմակերպությունների հետ համագործակցությամբ իրագործված ծրագրեր

2025թ. շահառուների շրջանում գրանցվել է շուրջ 20% աճ:

    Մասնագիտական ծառայություններ տրամադրելու նպատակով «Հոգեկան առողջության իրազեկման նախաձեռնություն» ՀԿ-ի հետ համագործակցությամբ իրականացվել է «Հուզական աջակցության թեժ գիծ» փորձնական ծրագիրը, որի արդյունավետ իրագործման շնորհիվ այժմ գործում է համազգային հուզական աջակցության թեժ գիծ: 
    Երևան քաղաքապետարանը, կարևորելով լսողության խանգարում ունեցող անձանց ունեցած բազմաթիվ մարտահրավերները, աջակցում է «Խուլ անձանց հզորացում հանուն ներառման» ծրագրին, որի շնորհիվ ՀՀ ողջ տարածքում հնարավորություն է ստեղծվում ապահովելու հեռավար թարգմանության հասանելիությունը:
 «Հայաստանի խուլերի միավորում» հասարակական կազմակերպությանը տրամադրված աջակցության շնորհիվ  քաղաքացիները հնարավորություններ են ունենում առողջապահական, կրթական հաստատություններում և մի շարք տարբեր կառույցներում անխոչընդոտ ստանալ սուրդոթարգմանչական ծառայություն /2025 թվականին ստացվել է 4737 զանգ/:
    Կարևորելով անօթևան անձանց ունեցած խնդիրների բազմաշերտությունը՝ վարչությունն աջակցում է «Հանս Քրիստիան Կոֆոեդ» բարեգործական հիմնադրամին, որը ՀՀ-ում գործող միակ աօթևանների կացարանն է: Յուրաքանչյուր ամիս ներկայացրած հաշիվների հիման վրա տրամադրվում է աջակցություն՝ կոմունալ ծառայությունների դիմաց փոխհատուցելու  նպատակով: Կազմակերպությունը հնարավորություն է ունենում ծառայություններ տրամադրել շուրջ 100 անօթևան անձի: 
    Երևանի քաղաքապետարանը, կարևորելով բազմազանության և ներառականության ապահովումը, աջակցություն է տրամադրում «Քայլ առաջ» սոցիալական ՀԿ-ին՝ աուտիզմի սպեկտորի խանգարումներ ունեցող երեխաներին, դեռահասներին, պատանիներին և նրանց ընտանիքի անդամներին վիճակված բազմաթիվ մարտահրավերներն ու խոչընդոտները միասին հաղթահարելու նպատակով: «Քայլ առաջ» սոցիալական ՀԿ-ին տրամադրած աջակցության շնորհիվ հաշմանդամություն ունեցող շուրջ 120 երեխաներ /այդ թվում սոցիալական աջակցության կարիք ունեցող/ հնարավորություն են ունեցել ստանալ անվճար թերապիաներ:
    Երևանի քաղաքապետարանը աջակցություն է տրամադրել «ՍՈՐՍ» հաշմանդամություն ունեցող երեխաների և նրանց ընտանիքների աջակցության հիմնադրամին՝ հզորացնելու, աջակցելու, կողք կողքի կանգնելու և որպես տեղական ինքնակառավարման մարմին պարտականությունները համատեղ հաղթահարելու նպատակով: «ՍՈՐՍ»-ը ծառայություններ է տրամադրել հազվագյուտ հիվանդություններ ունեցող, հաշմանդամություն ունեցող շուրջ 160 երեխայի՝ կյանքի որակի բարելավմանը, առողջական և մտավոր զարգացմանը նպաստող ծրագրեր իրագոչծելու նպատակով:
    Երևան համայնքը աջակցություն է տրամադրել «Մանկական զարգացման հիմնադրամին»: Ծրագրով մատուցվող ծառայությունների շնորհիվ համայնքի նպատակն է  առավել ընդգծել սոցիալական ներառման կարևորությունն ու այդ գործընթացում ունենալ հիմնարար դեր: Հիմնադրամին տրամադրած աջակցության շնորհիվ կազմակերպությունը հնարավորություն է ունեցել աջակցել կյանքի դժվարին իրավիճակում հայտնված ընտանիքների 50-ից ավելի երեխաների՝ տրամադրելով սոցիալ-հոգեբանական, լոգոպեդական, հատուկ մանկավարժական, երաժշտաթերապիայի, թերապևտիկ ծառայություններ:
    Երևանի քաղաքապետարանի աջակցությամբ «Հայաստանի կույրերի միավորում» հաշմանդամների ՀԿ-ն կազմակերպեց «Մեր փոքրիկ հողի դու մեծ երազանք» խորագրով համայնքահեն համերգը, որի նպատակն էր նաև զբաղվածության ապահովումը մասնակիցների համար, քանի որ երգիչ-երաժիշտները տեսողության խնդիրներ ունեցող անձինք են: 
    «ՀՀ Մարշալ Բաղրամյանի անվան վետերանների միավորում» ՀԿ-ին տրամադրվել է աջակցություն Հաղթանակի 80-ամյակի կապակցությամբ 21 վետերանների աջակցելու համար: 
    Երևան համայնքըաջակցություն է տրամադրել նաև «Առաքելություն Հայաստան» ԲՀԿ-ին, որի շնորհիվ կազմակերպության շահառուները /տարբեր ծրագրերում ընդգրկված է 2734 անձ/ հնարավորություն են ունեցել ստանալ մի շարք սոցիալական, հոգեբանական, իրավաբանական և այլն ծառայություններ: Շահառուների հիմնական մասը տարեցներ են, ովքեր կառույցի տարբեր մասնաճյուղերում կարողանում են ստանալ սնունդ, մասնակցել խմբակների, ունենալ ցերեկային զբաղվածություն և այլն: Ծրագրի մի հատվածն էլ միտված է հաշմանդամություն ունեցող երեխաներին տրամադրվող ծառայություններին:
    Երևանի քաղաքապետարանը աջակցություն է տրամադրել «Լիարժեք կյանք» ներառական հասարակության խթանման ՀԿ-ի կողմից իրականացվող «Ներառական ամառային ճամբար» ծրագրին, որը հնարավորություն տվեց շուրջ 150 երեխաների և նրանց ուղեկցողներին անցկացնել ամառային հանգիստը Ստեփանավանում գործող «Լիարժեք կյանք» ՀԿ-ի ներառական ճամբարում, ինչպես նաև ստանալ մի շարք ծառայություններ:
    Երևան համայնքը աջակցել է «Փրկություն» ՀԿ-ին, որը Երևան համայնքի տարբեր վարչական շրջաններում բնակվող մտավոր խնդիրներ ունեցող շուրջ 60 հաշմանդամություն ունեցող անձանց տրամադրում է մի շարք ծառայություններ:

Սոցիալական ծառայությունների ներդրում
Կարևորելով Երևան համայնքում սոցիալական ծառայությունների տրամադրման համար համապատասխան ՀՈԱԿ-ի հիմնումը՝ իրականացրել է համապատասխան աշխատանքներ, որոնք միտված են սոցիալական ծառայություններ մատուցող կառույցի ձևավորմանը:
Երևան-Քեմբրիջ քույր քաղաքների ասոցիացիայի հետ համագործակցությամբ  ուսումնասիրվել է Քեմբրիջի լավագույն փորձն ու դիտարկվել դրա տեղայնացման հնարավորությունը Երևանում: 
Այսպիսով, կարևորելով Երևանում համայնքային սոցիալական ծառայությունների համակարգի զարգացումն ու համալիր մասնագիտական աջակցության տրամադրումը՝ գնման գործընթացով իրականացվեց համայնքային մակարդակում գործող սոցիալական ծառայությունների կազմակերպման համար անհրաժեշտ հիմքերի ձևավորումը՝ ներառյալ իրավական, սոցիալական, հոգեբանական և վերականգնողական ծառայությունների ամբողջական համակարգի մշակումը: Ծրագրի նպատակն է ունենալ նոր ՀՈԱԿ (համայնքային ոչ առևտրային կազմակերպություն), որը մարդակենտրոն աջակցություն կտրամադրի՝ ապահովելով խոցելի խմբերի համար գիտահեն, ապացուցողական և միջազգային չափորոշիչներին համապատասխան սոցիալական ծառայությունների մատուցումը։ 
Ծրագրով կազմակերպվել է 2-օրյա մասնագիտական հանդիպում՝ ներգրավելով քաղաքապետարանի համապատասխան ստորաբաժանումներն ու վարչական շրջանների ներկայացուցիչներին՝ ապահովելու փորձի փոխանակումը և մասնագիտական դիտարկումները, նաև կազմակերպվել է ամփոփիչ միջոցառում-քննարկում՝ ընդգրկելով նաև քաղհասարակական ոլորտի ներկայացուցիչներին:
Միաժամանակ տեղի է ունեցել հանդիպում-քննարկում Երևանի քաղաքապետարանում և նշված հանդիպումների ընթացքում ներկայացվել են ուսումնասիրությունների արդյունքները, գրանցվել մասնագիտական առաջարկները և կազմվել վերանայված փաստաթղթերը։ Արդյունքում ստացել ենք համայնքային սոցիալական ծառայությունների ներդրման նախագծման համար անհրաժեշտ ամբողջական մոդելի պատկերը և փաստաթղթային փաթեթը՝ ՀՈԱԿ-ի գործունեության մեկնարկը տալու նպատակով։

Տարեցներին տրամադրված սոցիալական  աջակցություն

Կազմակերպվել է ներգնա 55 շրջագայություն շուրջ 1100 տարեցի համար՝ ՀՀ տարբեր տեսարժան վայրեր /Գառնի, Գեղարդ, Ստեփանավան, Սևան, Տաթևի վանք, Դիլիջան, Նորավանք և այլն/: Շրջագայությունների ընթացքում բոլոր խմբերին ուղեկցել են սոցիալական աշխատողը, բուժքույրն ու էքսկուրսավարը: Հաշվի առնելով այն հանգամանքը, որ նշված խմբի անձինք ակտիվ մասնակցություն չեն ունենում միջոցառումների, շրջագայությունների, ուստի՝ ծրագիրը հնարավորություն տվեց ապահովել նրանց հանգիստը, ժամանցը, ձևավորել նոր սոցիալական կապեր վերջիններիս շրջանում:

Հաշմանդամություն ունեցող անձանց համար նախատեսված սոցիալական ծրագրեր

Սոցիալական ծրագրերի (սոցիալական տաքսի ծառայություն) շրջանակներում՝ սոցիալական տաքսի ծառայության կազմակերպման նպատակով նախորդ տարիներին կազմվել են տեխնիկական բնութագրեր և ներկայացվել գնման գործընթացի, սակայն, ծրագրի առանձնահատկություններից ելնելով, հայտ ներկայացնողներ չեն եղել: Դիտարկվել է Մեծ Բրիտանիայի փորձը: Ստացել ենք բազմաշերտ մեթոդաբանություն, ձևավորվել է տեխնիկական բնութագիր՝ հաշվի առնելով ոլորտում առկա կազմակերպությունների հետ համագործակցությունը և հաշմանդամություն ունեցող անձանց կարիքները: Դրա շնորհիվ ի հայտ է եկել շահող կազմակերպություն, սակայն նա հրաժարվել է ծրագրի իրականացումից:

Պատերազմից տուժած ընտանիքներին աջակցության տրամադրում (կենցաղային և բնակարանային պայմանների բարելավում՝ հարմարեցման աշխատանքներ)

2024 թվականի բյուջեով տրամադրված աջակցությամբ 8 զինհաշմանդամների բնակարաններում 2025թ. կազմակերպվել են հարմարեցման միջոցառումներ:

Երևանի սոցիալական աջակցության վերաբերյալ կամավոր խնդիրները լուծելու ծրագրեր

Երևանի քաղաքապետին կից հասարակական կարգով գործող սոցիալական աջակցության տրամադրման խորհրդի նիստը կայացել է 23.06.2025թ., որի ընթացքում քննարկվել և հաստատվել է 7 դեպք, որից 5-ը՝ ուսման վարձ, իսկ 2 դեպք՝ կենցաղային պայմանների բարելավմանը վերաբերող, սակայն 1 դեպքին է ընթացք տրվել, իսկ մյուսին առնչվող փաստաթղթերում առկա խնդիրները հնարավոր չի եղել լուծել: Հաջորդ նիստը տեղի է ունեցել 30.10.2025թ., ներկայացվել և հաստատվել է 11 դեպք (9 ուսման վարձ, 2 կենցաղային պայմանների բարելավում):

100 տարին լրացած քաղաքացիներին աջակցության տրամադրման ծրագիր

Հիմք ընդունելով Երևան քաղաքի ավագանու 19.11.2024թ. N 245-Ն որոշումը՝ նախատեսվեց Երևան համայնքում վերջին 5 տարվա հաշվառում ունեցող, 100 տարին լրացած քաղաքացիներին տրամադրել 1.000.000 ՀՀ դրամ: Համադրվել են ցուցակները՝ համագործակցելով ՀՀ ԱՍՀՆ և ՀՀ ՆԳՆ-ի հետ: Վարչական շրջանների կատարած ուսումնասիրության շնորհիվ կազմվել են համապատասխան կարգադրություններ, իսկ ֆինանսավորումն ապահովելու նպատակով համագործակցություն է ծավալվել «Հայփոստ» ՓԲԸ-ի հետ. 45 քաղաքացի ստացել է աջակցություն:

Երեխաների պաշտպանության ոլորտ

•    Չինաստանի Ժողովրդավարական Հանրապետության դեսպանատան կողմից ստացված աջակցությամբ Արցախից տեղահանված ընտանիքներին ուղղված աջակցության ծրագիր իրականացնելու նպատակով կազմվել է տեխնիկական բնութագիր, 475 արցախցի երեխաների տրամադրվել է մարզազգեստ:
•    Ամանորյա միջոցառումներին մասնակցելու նպատակով, նպաստելով սոցիալական ներգրավվածությանը, մշակույթի և տուրիզմի վարչության հետ համագործակցությամբ ԿԴԻՀ, սոցիալական աջակցության կարիք ունեցող և մի շարք այլ սոցիալական խմբերի ընտանիքների երեխաներին տրամադրվել է շուրջ 5470 տոմս:

Երեխաների պաշտպանության ոլորտում քաղաքապետարանը մշակում և իրագործում է տարաբնույթ ծրագրեր և միջոցառումներ՝ միտված երեխաների պաշտպանության համակարգի զարգացմանը և երեխաների իրավունքների իրացմանը:
Բաժնի կողմից 2025 թվականի ընթացքում իրականացվել են մի շարք ծրագրեր, կազմակերպվել միջոցառումներ, մասնավորապես. 
•    երեխան իրավունք ունի իր իրավունքներն ու շահերը շոշափող ցանկացած խնդիր լուծելիս ներկա լինելու դրա քննությանը և արտահայտելու սեփական կարծիքը ընտանիքում, դատարանում և այլ մարմիններում: Երեխայի սույն իրավունքի իրացմանն աջակցման նպատակով, ինչպես նաև, կարևորելով երեխաների մասնակցությունն իրենց վերաբերելի խնդիրների քննությանը, մեկնարկել է «Երեխային լսելու հատուկ սենյակների ստեղծում վարչական շրջաններում» ծրագիրը, որով նախատեսվում է Երևանի 8 վարչական շրջաններում հիմնել երեխային լսելու համար նախատեսված հատուկ կահավորված սենյակներ: 2025 թվականին իրականացվել է ծրագրի 1-ին փուլը, որի համաձայն մարդու իրավունքների միջազգային չափանիշներին համապատասխան մշակվել է գիտահեն, համապարփակ մեթոդաբանություն, վարչական շրջաններում կատարվել են չափագրումներ, ներկայացվել է սենյակների մոդելավորումը և նախահաշիվը՝ ծրագրի հաջորդ փուլն իրականացման համար,
•    առաջնորդվելով երեխաների շահերի պաշտպանության առաջնահերթության սկզբունքով, կարևորելով իրենց իրավունքների վերաբերյալ տեղեկացվածությունը,  երեխայակենտրոն մոտեցումը՝ ընթացիկ ուսումնական տարվա 1-ին կիսամյակի ընթացքում հանրակրթական 6 դպրոցներում սովորող շուրջ 500 երեխայի համար կազմակերպվել է «Երեխաների իրավունքների վերաբերյալ իրազեկում» թեմայով ինտերակտիվ բնույթի 12 թեմատիկ զրույցներ՝ երեխաների շրջանում թվային անվտանգության, արդյունավետ հաղորդակցության, հուզական աջակցության, փոխհարաբերությունների, սեռով պայմանավորված խտրականության, հոգեմեդ նյութերի ազդեցության և վտանգների, վնասակար սովորությունների, բռնության, ներառականության, հաշմանդամության, ռասայական, կրոնական խտրականության, սթրեսի, բուլինգի, աշխատանքային իրավունքների վերաբերյալ: Շուրջ 500 երեխայի համար կազմակերպվել է «Երեխաների իրավունքների վերաբերյալ իրազեկում» թեմայով նաև ինտերակտիվ բնույթի ներկայացում/բեմադրություն: 
«Մշակութային և կրթական միջոցառումներ կյանքի դժվարին իրավիճակում հայտնված երեխաների համար» ծրագրով կազմակերպվել են հետևյալ միջոցառումները.
•    շուրջ 50 երեխա այցելել է մշակութային հաստատություններ՝ Կոմիտասի անվան թանգարան-ինստիտուտ, Արամ Խաչատրյանի և Մարտիրոս Սարյանի տուն-թանգարաններ: Երեխաները ծանոթացել են հայազգի մեծանուն արվեստագետների կյանքին ու ստեղծագործությանը, մասնակցել կրթական ծրագրերին, միջոցառման ավարտին երեխաներին տրամադրվել են Կոմիտասի, Արամ Խաչատրյանի և Մարտիրոս Սարյանի վերաբերյալ գրքեր:
•    Շուրջ 150 երեխա այցելել է «Մաչանենց տուն» սոցիալական ձեռնարկություն: Երեխաները մասնակցել են լավաշի, կավագործության, տիկնիկագործության վարպետաց դասերին, դիտել «Մաչանենց թատրոնում» բեմադրվող ներկայացումները: 
•    Տոնական ուրախ ժամանց կազմակերպելու, ստեղծարարությանը նպաստելու նպատակով շուրջ 500 երեխա ընդգրկվել է Ամանորին նվիրված «Փրկելով սուրբծննդյան» տոները խորագրով միջոցառմանը: 
Երեխաների պաշտպանության միջազգային օրվան նվիրված կազմակերպվել է  «Երևանի քաղաքապետարանը՝ երեխաների համար» խորագրով հունիսմեկյան միջոցառում. դպրոցահասակ երեխաների մասնակցությամբ Երևանի ավագանու նիստ: Միջոցառման ավարտից հետո կազմակերպվել է երեխաների շրջայց Երևանի պատմության թանգարանում, տրամադրվել են նվեր-գրքեր:
•    Շրջակա միջավայրի պահպանման մասին գիտելիքներ տրամադրելու, ինչպես նաև հոգատարություն սերմանելու, կազմակերպությունների գործունեությանը, առանձնահատկություններին ծանոթացնելու նպատակով շուրջ 150 երեխա այցելել է «Կանաչապատում և շրջակա միջավայրի պահպանության» և «Կենդանիների խնամքի կենտրոն» ՀՈԱԿ-ներ:
•    Կենդանասիրությանը նպաստելու, բնության նկատմամբ հոգատարություն սերմանելու նպատակով Երևանի քաղաքապետարանի աշխատակազմի երեխաների և սոցիալական պաշտպանության և բնապահպանության վարչությունների համագործակցությամբ հուլիս-օգոստոս ամիսներին կազմակերպվել է 10-15 տարեկան շուրջ 100 երեխայի /7 վարչական շրջաններից/ այցելություն «Կենդանիների  խնամքի կենտրոն» ՀՈԱԿ:
•    Ապահովվել է նաև երեխաների մասնակցությունը Երևանի ծննդյան տարեդարձին, իրականացվել է  «Սիրո նամակ՝ Երևանին», «Իմ Երևանը, իմ արվեստը» և «Իմ աչքերի Երևանը» խորագրերով միջոցառումները, ընտրված լավագույն աշխատանքները ներկայացրած մասնակիցներն այցելել են «Էրեբունի» պատմահնագիտական արգելոց-թանգարան, հյուրընկալվել են Երևանի քաղաքապետարանում և արժանացել խրախուսական պարգևների: 
•    Ամանորին ընդառաջ «Արևիկ» գրատան հետ համագործակցությամբ կազմակերպվել է երկու միջոցառում.
    կյանքի դժվարին իրավիճակում հայտնված 1-ից 3-րդ դասարանի 15 երեխայի այցելություն «Արևիկ» գրատուն. իրականացվել է «Գաղտնիքների գիշեր» հեքիաթի ընթերցում, քննարկում, ամանորյա կախազարդերի պատրաստում:
    «Արևիկ» գրատան հետ համագործակցությամբ կազմակերպվել է խնամատար ընտանիքներում խնամվող 9 երեխաների և 8 խնամատար ծնողների այցելություն «Արևիկ» գրատուն. կազմակերպվել են սեղանի խաղեր, թեյի և թխվածքաբլիթի հյուրասիրություն:
•    Ամանորին ընդառաջ «Հայաստանի թեթև արդյունաբերության զարգացման կենտրոն» հիմնադրամի հետ համագործակցությամբ կազմակերպվել է կյանքի դժվարին իրավիճակում հայտնված 13-15 տարեկան 15 երեխայի այց SPACE 59 կենտրոն, ամանորյա կախազարդերի վարպետաց դաս է կազմակերպվել և հյուրասիրություն: 

Երեխաների պաշտպանության բաժինը իրականացնում է նաև գործող օրենսդրությամբ և Երևանի քաղաքապետարանի աշխատակազմի երեխաների և սոցիալական պաշտպանության վարչության կանոնադրությամբ ամրագրված մի շարք գործառույթներ.
•    Վարչական շրջանների կողմից ներկայացված տեղեկատվության համաձայն հաշվառվել է առանց ծնողական խնամքի մնացած 59 երեխա, առանց ծնողական խնամքի մնացած երեխաների թվին պատկանող 4 անձ:
•    30 երեխայի տրամադրվել է երեխաների խնամքի հաստատությունում տեղավորվելու մասին եզրակացություն, 1 երեխայի տրվել է բնակչության սոցիալական պաշտպանության հաստատությունից կենսաբանական ընտանիք վերադարձնելու համար եզրակացություն: 
•    Քաղաքացիների կողմից ներկայացված փաստաթղթերը և կենսապայմանների ուսումնասիրության ակտերով, ինչպես նաև միասնական սոցիալական ծառայության տարածքային կենտրոնների կողմից ներկայացված եզրակացություններով տրամադրվել է երեխա որդեգրելու հնարավորության մասին 16 դրական և 1 բացասական եզրակացություն, հաշվառման է վերցվել երեխա որդեգրել ցանկացող 23 անձ: Նշված կարգի համաձայն կազմվել և ՀՀ աշխատանքի և սոցիալական հարցերի նախարարություն է ուղարկվել հարցումներ՝ երեխային տեսակցելու և որդեգրելու հնարավորությունը պարզելու համար, հաշվառվել են որդեգրման ենթակա երեխաներ:
•    5 քաղաքացի հաշվառվել է որպես խնամատար ծնող դառնալ ցանկացող անձ: Որպես խնամատար ծնող դառնալ ցանկացող հաշվառված անձանց դիմումների հիման վրա համադրվել է խնամատար ծնող դառնալ ցանկացող անձանց և խնամատարության ենթակա երեխաների  տվյալները: Խնամատարության պայմանագրերի ժամկետները երկարաձգելու համար կազմվել են «Խնամատարության պայմանագրերի փոփոխությունների և լրացումներ կատարելու մասին» 17 համաձայնագրերի նախագծեր: Խնամատար ծնող դառնալ ցանկացող անձանց և խնամատարության ենթակա երեխաների տվյալների համադրմամբ կազմակերպված հանդիպումներին մասնակցելու նպատակով այցեր են կատարվել  բնակչության սոցիալական պաշտպանության հաստատություններ:
•    Իրականացվել է խնամատար ընտանիքում խնամվող երեխայի՝ հոգեզավակի կյանքի, առողջության, դաստիարակության և կենսապայմանների նկատմամբ վերահսկողություն, ինչպես նաև որդեգրողի ընտանիքում որդեգրված երեխայի խնամքի նկատմամբ  վերահսկողություն:
Կյանքի դժվարին իրավիճակներում հայտնված երեխաների տվյալները մուտքագրվել են «Մանուկ» տեղեկատվական համակարգ, ըստ անհրաժեշտության կատարվել են համապատասխան փոփոխություններ:
•    ՄԱԿ-ի կայուն զարգացման նպատակների ազգայնացման գործընթացն ապահովելու նպատակով իրականացվող ծրագրով 1-17 տարեկան երեխաների նկատմամբ ծնողների, խնամատարների, օրինական ներկայացուցիչների կողմից ֆիզիկական պատժի և/կամ հոգեբանական ագրեսիայի վերաբերյալ վարչական շրջաններից հավաքած տեղեկատվությունն ամենամսյա կտրվածքով ներկայացվել է ՀՀ աշխատանքի և սոցիալական հարցերի նախարարություն՝ կարևորելով երեխաների նկատմամբ բռնության կանխարգելումը և միջգերատեսչական համագործակցության արդյունավետության բարձրացումը:
•    Վարչական շրջանների խնամակալության և հոգաբարձության հանձնաժողովների հետ քննարկվել են բացահայտված կյանքի դժվարին իրավիճակում հայտնված երեխաների դեպքերը և իրականացվել է ուղղորդում համապատասխան պետական և հասարակական կառույցներ՝ անհրաժեշտ ծառայություններ ստանալու նպատակով: Բաժնի աշխատակիցները մասնակցել են վարչական շրջանների խնամակալության և հոգաբարձության հանձնաժողովների այն նիստերին, որտեղ քննարկվել են երեխային առնչվող հատուկ դեպքեր: Պարբերաբար տրամադրվել են մասնագիտական խորհրդատվություն և մեթոդական աջակցություն խնամակալության և հոգաբարձության հանձնաժողովներին և վարչական շրջանների երեխաների և սոցիալական պաշտպանության բաժնի աշխատակիցներին:
•    Երեխաների պաշտպանության ոլորտում համագործակցություն է իրականացվել ՀՀ աշխատանքի և սոցիալական հարցերի, արդարադատության, ներքին գործերի նախարարությունների, վարչական շրջանների ղեկավարների աշխատակազմերի, միասնական սոցիալական ծառայության տարածքային կենտրոնների, բնակչության սոցիալական պաշտպանության հաստատությունների, ինչպես նաև ոլորտում ակտիվ գործունեություն ծավալող կազմակերպությունների հետ:
•    Երեխաների պաշտպանության վերաբերյալ տարբեր խնդիրներով Երևանի քաղաքապետարան դիմած քաղաքացիներին տրամադրվել է խորհրդատվություն: Վարչությունը մասնակցել է երեխաների պաշտպանության ոլորտին առնչվող հանդիպումներին, քննարկումներին, խորհրդատվություններին: Ոլորտային օրենսդրական նախագծերն ուսումնասիրվել են բաժնի կողմից և ներկայացվել են համապատասխան առաջարկներ, որոնք մեծամասամբ ընդունվել են ոլորտի լիազոր մարմնի կողմից և արտացոլվել են իրավական ակտերում կամ ներառվել են նախագծերում: