Փակել
Մշակույթի և տուրիզմի վարչության գործունեությունը
Երևանի ենթակայությամբ գործում է 70 մշակութային կազմակերպություն, այդ թվում՝ 3 թատրոն (Երևանի Հրաչյա Ղափլանյանի անվան դրամատիկական, Պատանի հանդիսատեսի, «Մհեր Մկրտչյան» արտիստական թատրոնները), 19 գրադարան (այդ թվում՝ Ավ. Իսահակյանի անվան կենտրոնական գրադարանը), 5 թանգարան («Էրեբունի» պատմահնագիտական արգելոց-թանգարանը, Երևան քաղաքի պատմության, Ժամանակակից արվեստի, Կարեն Դեմիրճյանի և Ֆրիտյոֆ Նանսենի թանգարանները)։
Երևանի ենթակայությամբ գործում են երաժշտական, արվեստի և կերպարվեստի 26 դպրոցներ, որոնց սաները մասնակցում են համապետական և միջազգային մրցույթների, փառատոների՝ արժանանալով բարձր պարգևների և մրցանակների։
Երևանի քաղաքապետարանի աշխատակազմի մշակույթի և տուրիզմի վարչության համակարգմամբ են գործում նաև Յու. Բախշյանի անվան և «Հայաստանի փոքրիկ երգիչներ» մանկական ֆիլհարմոնիաները, «Երևան» փողային նվագախումբը, Երևանի մանկապատանեկան ստեղծագործության քաղաքային կենտրոնը, «Հայ-Արտ» մշակութային կենտրոնը:
Վարչական շրջաններում գործում են գեղարվեստական կրթության և գեղագիտական դաստիարակության հաստատություններ, որոնց սաները մշտապես մասնակցում են քաղաքային, համապետական և միջազգային նշանակության տարաբնույթ ստեղծագործական-մշակութային նախագծերին։
Աշխատակազմի մշակույթի և տուրիզմի վարչությունն իրականացնում է մշակույթի և զբոսաշրջության զարգացմանը միտված ծրագրեր, ինչպես նաև պետական, ազգային տոներին նվիրված միջոցառումներ։
2023 թվականի ընթացքում իրականացված ծրագրեր
- Շառլ Ազնավուրի անվան հրապարակում իրականացվել է Գիրք նվիրելու օրվան նվիրված միջոցառում, որի ընթացքում կազմակերպվել են համերգային ծրագրեր, պանելային քննարկումներ, գործել են զեղչված արժեքով գրքերի վաճառքի տաղավարներ:
- Կանանց տոնի առիթով Երևանում գործող թատերահամերգային 11 կազմակերպությունից ձեռք են բերվել մշակութային միջոցառումների ծառայություններ, որոնց մասնակցության 22000 տոմսերը տրամադրվել են քաղաքային տնտեսության տարբեր ոլորտներում ներգրավված կանանց:
- Ջազի միջազգային օրվա առթիվ Գաֆեսճեան քանդակների պուրակում կազմակերպվել է համերգային մեծածավալ ծրագիր՝ հայ և արտերկրի հանրահայտ ջազային երաժիշտ կատարողների մասնակցությամբ:
- Երեխաների իրավունքների պաշտպանության օրվա առիթով Ազատության հրապարակում իրականացվել է մանկական ժամանցի, մանկապատանեկան ստեղծագործական մտքի խթանման և համերգային այլ ծրագրեր:
- Արամ Խաչատրյանի ծննդյան 120-ամյակի առթիվ առաջին անգամ տարածաշրջանում իրականացվեց մեծանուն կոմպոզիտորի բալետային ստեղծագործությունների բացօթյա ցուցադրությունների ծրագիրը, որի ընթացքում Թումանյանի անվան այգում 15000 հանդիսականի համար ներկայացվեցին «Գայանե», «Սպարտակ» և «Դիմակահանդես» բալետները:
- Թումանյանի անվան այգում իրականացվեց «Օպերա բաց երկնքի տակ» մեգանախագիծը, որի ընթացքում Ա. Սպենդիարյանի անվան օպերայի և բալետի ազգային ակադեմիական թատրոնի ստեղծագործական կազմը ներկայացրեց «Անուշ» և «Տրավիատա» օպերաների բացօթյա ցուցադրությունները, կայացավ «Օպերա գալա» ծրագիրը՝ հայ և օտարազգի օպերային աստղերի մասնակցությամբ, որոնց ներկա եղավ շուրջ 20000 հանդիսատես:
- Ամանորին և սուրբծննդյան տոներին նվիրված միջոցառումների կապակցությամբ թատերահամերգային 4 կազմակերպությունից ձեռք է բերվել շուրջ 5000 տոմս, որը «Ակտիվ քաղաքացի» հարթակի միջոցով հատկացվելու է շահառուներին:
- Երևանի ենթակայության երաժշտական, արվեստի և կերպարվեստի դպրոցներում նախնական մասնագիտական կրթության, արտադպրոցական գեղագիտական դաստիարակության ծրագրերի իրականացմամբ կազմակերպվել է շուրջ 9000 երեխայի ուսուցումը, կազմակերպվել է Երևանի երաժշտական և արվեստի դպրոցների 14-րդ մրցույթ-փառատոնը, Արամ Խաչատրյանի անվան պատանի ստեղծագործողների ստուգատես-փառատոնը, կազմավորվել է «Երևան» պատանեկան սիմֆոնիկ նվագախումբը, որի առաջին ելույթը նախատեսված է 2024թ. փետրվարին: Իրականացվել է «Արտիստը՝ դպրոցին» ծրագիրը. ՀՀ վաստակավոր արտիստ, հանրահայտ դաշնակահար Հայկ Մելիքյանը վարպետության դասերով հանդես եկավ Երևանի ենթակայության 24 երաժշտական և արվեստի դպրոցներում, իսկ վարպետության դասընթացների ընթացքում աչքի ընկած սովորողները Հայկ Մելիքյանի հետ ելույթ ունեցան տարեվերջյան գալա համերգում:
Դպրոցների գերազանց առաջադիմությամբ սովորող տասնյակ աշակերտներ մասնակցել են բազմաթիվ համապետական և միջազգային մրցույթների և ցուցահանդեսների՝ արժանանալով մրցանակների։ Ազգային նվագարանների և հայ երաժշտական ավանդույթների պահպանման, տարածման և հանրահռչակման նպատակով երաժշտական և արվեստի դպրոցներում իրականացվել է ազգային, լարային և փողային նվագարանների գծով ուսման վարձավճարների փոխհատուցման ծրագիրը, որին ընդգրկվել է 277 շահառու:
- Երևանի ենթակայության 19 գրադարանում շարունակվել է գրադարանային-տեղեկատվական ծառայությունների մատուցումը, կազմակերպվել են զանգվածային բնույթի միջոցառումներ` որպես նոր ընթերցողներ ներգրավելու և մշակութային, կրթադաստիարակչական քաղաքականություն իրականացնելու կարևորագույն միջոց: Երևանի համայնքային գրադարանները 2023թ. ընթացքում համալրվել են 482 անուն 12632 հատ գրքով:
- Արվեստի և մշակույթի տարբեր ոլորտներ զարգացնելու նպատակով Երևանի քաղաքապետարանն իրականացրել է մի շարք դրամաշնորհային ծրագրեր, աջակցել կայացած, ինչպես նաև ոլորտում առաջին քայլերն անող մշակութային ծրագրերին և փառատոներին: Մասնավորապես, իրականացվել է «Թատերական Երևան» դրամաշնորհային ծրագիրը, որի ընթացքում թատերական 9 նախաձեռնությունների հատկացվել է շուրջ 50 մլն ՀՀ դրամ: «Արամ Խաչատրյան-120» միջոցառումների շարքում իրականացվել է ստեղծարարական նախաձեռնությունների դրամաշնորհային մրցույթը, որի ընթացքում ընտրված 9 նախաձեռնությունների իրականացման համար հատկացվել է շուրջ 40 մլն ՀՀ դրամ:
Կազմակերպվել է «Երևանը՝ կանանց համար» դրամաշնորհային ծրագիրը՝ արվեստի տարբեր ուղղություններում ստեղծագործող կանանց խրախուսելու նպատակով: Ներկայացված հայտերից հաղթող է ճանաչվել 13 դիմումատու՝ «Արվեստի կրթություն», «Քանդակագործություն», «Երաժշտարվեստ», «Թատերարվեստ» անվանակարգերում: Ընդհանուր առմամբ ծրագրի իրականացման համար հատկացվել է 26 մլն ՀՀ դրամ:
Իրականացվել է կարճամետրաժ խաղարկային կինոնկարների և թարգմանական դրամաշնորհային ծրագրերի առաջին փուլը, բացի այդ, աջակցություն է հատկացվել Գեղարվեստական տպագրության միջազգային բիենալեին, «Երևանյան հեռանկարներ» միջազգային փառատոնին, «Ոսկե ծիրան», «Ռեանիմանիա» և Կարճամետրաժ ֆիլմերի միջազգային փառատոներին, Կ. Դեմիրճյանի անվան մարզահամերգային համալիրի հիմնադրման 40-ամյակին նվիրված ծրագրին, այլ ծրագրերի և միջոցառումների: