Երևանում այս տարի կանաչ տարածքները կընդլայնվեն շուրջ 15 հեկտարով, կանցկացվի 30 կմ ոռոգման նոր ցանց:
Գարնանային ծառատունկին շուրջ 6000 ծառ կտնկվի, 4000-ը` «Եռաբլուրում», մնացածը՝ քաղաքի տարբեր հատվածներում: Ծառերի մեծ մասn արժեքավոր, երկարակյաց տեսակներ են՝ սոսիներ, կաղնիներ, ձիակասկեր, եղևնիներ, նաև 300 դեկորատիվ ծառեր կզարդարեն քաղաքի մայթեզրերն ու այգիները: 
 «Կանաչ ֆոնդի ընդլայնումը կապված է ոռոգման ցանցի հետ: Այս տարի նախատեսված է շուրջ 30 կմ՝ միայն կանաչապատման հիմնարկի ծրագրերում: Մոտ 8 կմ այս պահին արդեն անցկացված է»,- նշում է «Կանաչապատում և շրջակա միջավայրի պահպանություն» ՀՈԱԿ տնօրեն Արմեն Բեգոյանը:  
Այն  հատվածներում, որտեղ արդեն ոռոգում կա, մեկնարկել են կանաչապատման հիմնական աշխատանքներն ու ծառատունկը: 2023թ. կարևոր ու պատասխանատու նախագիծը «Եռաբլուր» զինվորական պանթեոն տանող ճանապարհին անտառպուրակի հիմնումն է: Նախապատրաստական աշխատանքներն ավարտված են, ապրիլի 8-ին ծառատունկն է: 
«Երևանի քաղաքապետարանն այս գարնանը մայրաքաղաքում կտնկի շուրջ 6000 ծառ, 4000-ը՝ Եռաբլրում, 1500-2000-ն էլ կձևավորեն քաղաքի մայթեզրերը: Ձեռք ենք բերել ավելի քան 20 ծառատեսակ: Ծառատեսակներից մոտավորապես 300 դեկորատիվ են, մնացած 1500-1700-ը սոսիներ են, կաղնիներ են, ձիակասկեր:  Իհարկե, կարևոր է մեծ սաղարթով ծառեր տնկելը, բայց դրա համար պետք են անհրաժեշտ տարածք, իսկ երևանյան մայյթերը, ցավոք, նեղ են»,-ասում է Բեգոյանը: 
Թե քաղաքի ո՞ր հատվածում, ինչ ծառատեսակ պետք է տնկել՝ մասնագետները երկար են քննարկում: Ամեն մի տեղանք յուրահատուկ նշանակությունն ունի քաղաքի ու բնակիչների համար:
«Կան արժեքավոր ծառեր, որոնք առավելագույնս մաքրում են օդը և կան ծառեր, որոնք գեղազարդության համար են: Արժեքավոր ծառերը կրկնակի, եռակի ավելի շատ են, քան գեղազարդները»,-ընդգծում է ՀՈԱԿ-ի փոխտնօրեն Արթուր Խալաթյանը: 
«Նոր ծառերի զգալի մասը կփոխարինի կենսունակությունը կորցրածներին: Բանն այն է, որ անգամ քիչ թե շատ ուժեղ քամուց քաղաքում գրանցվում է ծառի տապալման հերթական դեպքը՝ վնասելով շինություններ ու մեքենաներ:  Հենց դրա համար էլ ծառերը պետք է ժամանակին փոխարինել»,-ասում է ավելի քան 40 տարվա բուսաբան-ծառագետի փորձը քաղաքին փոխանցող կանաչապատման համայնքային կազմակերպության գլխավոր դենդրոլոգ Արծվի Գրիգորյանը և հավելում, որ առաջին հերթին փոխարինվում են անարժեք տեսակները, նաև հիվանդ ու հանրության առողջությունը վտանգող տեսակները:
Տնկվող բոլոր նոր ծառերն ավելի քան 10 տարեկան 3-5մ բարձրությամբ ծառեր են:  Ծառատունկի ընթացքում ձևավորվում են նաև նոր ծառուղիներ: Դրանցից մեկը Նոր Նորքի ծայրամասային հատվածում է: 
«Մոտ 170 գծմ տարածքում ընդհանրապես ծառ չի եղել: Տնկել ենք սոսիներ, որոնք 5 մետր բարձրություն ունեն»,- ասում է գլխավոր ծառագետը:
Գարնանը քաղաքում տնկված ծառերն արդեն հասցրել են հարմարվել տեղանքին, կանաչել ու անգամ՝ ծաղկել:
Այս տարի Երևանի կանաչ տարածքները նաև կձևավորվեն մոտ 1 մլն ծաղիկներով,  բույսերով ու թփերով: 
«Դրանցից կես միլիոնը ջերմոցատնկարանային տնտեսության արտադրանքն է: Հետագայում նախատեսում ենք նաև ընդլայնել  տնտեսությունը»,- նշում է ՀՈԱԿ-ի տնօրենը: 
Քաղաքի կանաչ տարածքների թարմացումը, առողջացումը, պահպանումն ու  ընդլայնումը քաղաքային կանաչապատման օրակարգային խնդիրներն են, որոնց լուծումը մշտապես քաղաքային իշխանության ուշադրության կենտրոնում է: