Երևանի քաղաքապետարանի նախաձեռնությամբ նոյեմբերի 20-25-ը մայրաքաղաքում առաջին անգամ անցկացվող արտաքին գովազդի փառատոնի շրջանակում մեկնարկել է համաժողով, որին ներկա է գտնվել Երևանի քաղաքապետի տեղակալ Դավիթ Օհանյանը: Ողջունելով մասնակիցներին Երևանի քաղաքապետ Տարոն Մարգարյանի անունից` քաղաքապետի տեղակալը շնորհակալություն է հայտնել փառատոնի կազմակերպիչներին` վստահություն հայտնելով, որ արտասահմանցի աշխարհահռչակ մասնագետների վարպետության դասերը և համաժողովներն ուսուցողական կլինեն գովազդային գործակալությունների ու ոլորտի այլ ներկայացուցիչների համար, ինչի արդյունքում շուտով մայրաքաղաքում կհայտնվեն նոր ու ժամանակակից լուծումներով գովազդներ: 

Համաժողովին մասնակցել են ինչպես գովազդային կազմակերպությունների, այնպես էլ բանկային, հեռահաղորդակցության ոլորտների ներկայացուցիչներ, ուսանողներ: Համաժողովի ընթացքում մասնագիտական քննարկումներ են անցկացրել Saatchi&Saatchi ընկերության արտ-տնօրեն Ֆաբիո Կոստան և Zeno Group ընկերության արտ-տնօրեն Մելանի Քլենսին: Փորձագետները պատասխանել են նաև համաժողովի մասնակիցների հարցերին:

Երևանի քաղաքապետարանի տեղեկատվության
և հասարակայնության հետ կապերի վարչություն