Գողտրիկ հրապարակներից է Ուրուգվայի հրապարակը, որ վերանվանվել է 1997 թվականին: Գտնվում է Պարոնյան փողոցից Հրազդանի կիրճ տանող ճանապարհին։ 

Դյորի հրապարակը գտնվում է Նոր Նորք համայնքում։ Այն շաղկապում է Դավիթ-Բեկի, Շոպրոնի, Բադալ Մուրադյան և Միկոյան փողոցները։ Հրապարակն անվանակոչվել է Հունգարիայի Դյոր քաղաքի անունով, որը նաև այդ երկրի Դյոր-Շոպրոն մարզի վարչական կենտրոնն է։

Աշխատանքի հրապարակը գտնվում է Բագրատունյաց և Արշակունյաց պողոտաների հատման վայրում։ Ճանապարհատրանսպորտային կարևոր դեր է կատարում։ Նախկինում այստեղ էր տեղադրված «Բանվորի» («Փառք աշխատանքին») արձանը, որը կազմաքանդվել է 1990-ական թվականների կեսերին։ Աշխատանքի հրապարակ է անվանվել 1981 թվականից:

Եվրոպայի խորհրդի հիմնադրման 70-ամյակի կապակցությամբ, ի նշանավորումն Եվրոպա մայրցամաքի երկրների և Եվրամիության հետ համընդհանուր արժեքների վրա հիմնված համագործակցության, Հյուսիսային պողոտայի միջանկյալ հատվածը ավագանու 2019թ. մարտի 19-ի որոշմամբ անվանակոչվել է Եվրոպայի անունով:

Բացման հանդիսավոր արարողությանը մասնակցել է ԵԽԽՎ նախագահ Լիլիան Մորի Պասկիեն: Քաղաքապետը ԵԽԽՎ նախագահին է փոխանցել նաև հրապարակն անվանակոչելու մասին Երևանի ավագանու որոշումը: