Երևան քաղաքում ճանապարհային երթևեկության և հանրային տրանսպորտի կառավարման արդյունավետությունը բարձրացնելու նպատակով Երևան քաղաքի ավագանու 2025 թվականի նոյեմբերի 18-ի N 456-Ա որոշմամբ ստեղծվել է «Երևանի երթևեկության կառավարման կենտրոն» համայնքային հիմնարկը։ Հիմնարկը պետական գրանցում է ստացել 2026 թվականի հունվարի 5-ին։
Կենտրոնի հիմնական նպատակը Երևանում երթևեկության և հանրային տրանսպորտի կառավարման ժամանակակից, տվյալահեն համակարգի ձևավորումն է՝ թվային տեխնոլոգիաների և տվյալների վերլուծության գործիքների կիրառմամբ։
Կենտրոնը նպատակ ունի իրականացնել երթևեկության և տրանսպորտային համակարգերի վերաբերյալ տվյալների հավաքագրում, մշակում և վերլուծություն՝ օգտագործելով տարբեր տեխնոլոգիական աղբյուրներ, այդ թվում՝ տրանսպորտային միջոցների տեղորոշման, տեսահսկման և այլ թվային համակարգեր։ Ստացված տվյալների հիման վրա նախատեսվում է իրականացնել երթևեկության հոսքերի, հանրային տրանսպորտի աշխատանքի, ենթակառուցվածքների վիճակի և քաղաքային շարժունակության վերլուծություն, ինչպես նաև մշակել երթևեկության կազմակերպման և կառավարման բարելավմանն ուղղված առաջարկություններ, լուծումներ և դրանց իրականացման միջոցներ։
Կենտրոնը նաև նախատեսում է փուլային ձևով ապահովել երթևեկության կառավարման ենթակառուցվածքների՝ ներառյալ լուսացուցային համակարգերի, կանգառների և այլ տրանսպորտային լուծումների մշտադիտարկումը և դրանց հիման վրա մշակել վերլուծություններ, առաջարկություններ և նախագծեր՝ ուղղված երթևեկության արդյունավետության բարձրացմանը, խցանումների նվազեցմանը և քաղաքում ավելի անվտանգ ու կայուն շարժունակության ապահովմանը։
2026 թվականին կենտրոնի գործունեությունը հիմնականում ուղղված է լինելու կազմակերպական և տեխնիկական հիմքերի ձևավորմանը, համակարգերի և տվյալների աղբյուրների գույքագրմանը, ինչպես նաև կենտրոնի գործունեության կարճաժամկետ և միջնաժամկետ զարգացման ռազմավարության մշակմանը։
Կենտրոնի գործունեությունը հանդիսանում է նաև Երևանի «Խելացի քաղաք» (Smart City) զարգացման հայեցակարգի կարևոր բաղադրիչներից մեկը՝ նպաստելով տվյալահեն կառավարման, խելացի շարժունակության և թվային կառավարման գործիքների զարգացմանը։ Այն փոխկապակցված է քաղաքային կայուն զարգացման նպատակների հետ՝ աջակցելով երթևեկության ավելի արդյունավետ կառավարմանը, կանաչ և անվտանգ քաղաքային միջավայրի ձևավորմանը և ժամանակակից շարժունակության համակարգերի զարգացմանը։
Փակել