Երևանի քաղաքապետ Տարոն Մարգարյանն աշխատանքային հերթական խորհրդակցության ժամանակ, նախքան օրակարգային հարցերին անցնելը, շնորհակալություն է հայտնել աշխատակազմի բոլոր ստորաբաժանումներին՝ ապրիլի 12-ին մայրաքաղաքում հայտարարված համաքաղաքային շաբաթօրյակ-ծառատունկը հավուր պատշաճի կազմակերպելու և անցկացնելու համար:

Ապրիլի 12 ին կայացած համաքաղաքային շաբաթօրյակ-ծառատունկի ընթացքում մայրաքաղաքի վարչական շրջաններում տնկվել է 17064 ծառ և 4780 թուփ: Երևանը միասնական ուժերով մաքրելու ու բարեկարգելու հանրօգուտ աշխատանքին ներգրավվել են վարչական շրջանների կանաչապատման ու սանմաքրման ընկերություններ, պետական ու մասնավոր կառույցներ, կրթական հաստատություններ ու առողջապահական ձեռնարկություններ, երևանցիներ:

Ձմեռվանից մնացած աղբի փոքր ու մեծ կուտակումներից քաղաքն առավելապես մաքրվելուց հետո էլ ավելի են ընդգծվել արդեն երկրորդ տարին անընդմեջ երևանյան գարնան ավետաբերը դարձած ծաղկած բազմերանգ կակաչները:

Մայրաքաղաքի առավել վտանգավոր վայրերից աղբի հավաքման աշխատանքները համքաղաքային շաբաթօրյակի ժամանակ կազմակերպվել և իրականացվել են ՀՀ ԱԻՆ Փրկարար ծառայության Երևանի փրկարարական վարչության փրկարարների հետ համատեղ:

Երևանի քաղաքապետարան-մասնավոր հատված արդյունավետ համագործակցության շրջանակում գովազդային խոշոր ընկերությունները, միանալով համաքաղաքային շաբաթօրյակի աշխատանքներին, նախաձեռնել և իրենց ուժերով մաքրել են գովազդային սյուներին և հենասյուներին տարբեր անձանց կողմից փակցված հայտարարությունները:

Մայրաքաղաքում հայտարարված համաքաղաքային ծառատունկի ընթացքում նոր տնկիներով համալրվեց նաև 16-րդ թաղամասի առաջին շղթայի բազմաբնակարան շենքերով պարփակված հանգստի փոքրիկ գոտին: Երևանի քաղաքապետ Տարոն Մարգարյանը բազմաթիվ աջափնյակցիների ու Երևանի ավագանու «Բարև Երևան» խմբակցության անդամ Արմեն Մարտիրոսյանի հետ միասին այստեղ ևս մասնակցել է ծառատունկին: 

Երևանի քաղաքապետ Տարոն Մարգարյանը, ՀՀ պաշտպանության նախարարի ժամանակավոր պաշտոնակատար Սեյրան Օհանյանի և Նոր Նորք վարչական շրջանի բնակիչների հետ միասին մասնակցել է նաև Տիգրան Մեծի այգում կազմակերպված ծառատունկին: Ի դեպ, հարկ է նշել, որ 2013թ. իրականացված վերակառուցման ծրագրի շրջանակում ամբողջությամբ արդիականացվել է նաև զբոսայգու ոռոգման համակարգը:

Երևանի բակային տարածքներում քաղաքացիներն աշխուժորեն մասնակցում են համաքաղաքային շաբաթօրյակին ու ծառատունկին։ Բակային տարածքներում աշխատանքները համակարգում են համատիրությունները՝ բնակիչներին տրամադրելով քաղաքապետարանի հատկացրած գործիքներ՝ բահեր, դույլեր և անհրաժեշտ այլ պարագաներ։

Երևանում շարունակվող համաքաղաքային շաբաթօրյակ-ծառատունկի հետ միասին վարչական բոլոր շրջաններում կազմակերպվել է նաև թափոնների հեռացումը:Աշխատանքներում ներգրավվել են աղբատար և մասնագիտացված այլ մեքենասարքավորումներ: Հեռացվել են նաև գերծանր կոնստրուկցիաները: 

Ապրիլի 12-ին մայրաքաղաքում հայտարարված համաքաղաքային ծառատունկին բազմաթիվ պետական ու մասնավոր հիմնարկ ձեռնարկությունների, ՀՀ-ում հավատարմագրված դիվանագիտական ներկայացուցչությունների, ուսումնական, առողջապահական և տարբեր այլ հաստատությունների ներկայացուցիչների, ինչպես նաև հազարավոր երևանցիների հետ միասին մասնակցել է նաև Երևանի քաղաքապետ Տարոն Մարգարյանը: 

Էրեբունի պատմահնագիտական արգելոց-թանգարանի հարակից կանաչապատ տարածքում շաբաթօրյակ էր թանգարանի աշխատակիցների, Երևանի քաղաքապետարանի, Էրեբունի վարչական շրջանի աշխատակազմի, «Երևաննախագծի» աշխատակիցների ու դպրոցականների մասնակցությամբ։

Երևանն ավելի մաքուր և ավելի կանաչապատ տեսնելու Երևանի քաղաքապետ Տարոն Մարգարյանի կոչին միանալով՝ հասարակական տասնյակ կազմակերպություններ շարունակում են մասնակցել մայրաքաղաքը մաքրելու և կանաչապատելու գործին: